Barosso: Silaannaap allanngoriartornera puigorneqartariaqanngilaq

Aningaasarsiornikkut ajornartorsioraluaraanniluunniit silaannaap allanngoriartornera puigortariaqanngitsoq, EU-Kommissionip siulittaasuata José Manuel Barossop ullaap tungaa tuluit ministeriunerat Gordon Brown ataatsimeeqatigitillugu oqarfigaa.
oktobarip 15-at 2008 12:58

Siuttut taakku aningaasarliorneq pinngortitarlu pillugit suliniutissanut pilersarutit ataatsimiissutigaat, ullumilu Brüssel-imi EU-mi Inatsisartuni taakkorpiaat eqqartugassat pingaarnerit ilagaat.

Tuluit ministeriunerat Gordon Brown ataatsimeeqatigereerlugu EU-mi Inatsisartut siulittaasuat José Manuel Barosso oqaloqatigiissutimik killiffiannik ima oqaaseqarpoq:

- Erseqqissumik iliuuseqarniarata malugitikkutta naatsorsuutigissanngilarput allat iliuuseqarumaartuttaaq. Barossop oqalugiarnermini mianersoqqussutigaalusooq aningaasarliornerup oqallisiginerata pinngortitap allanngoriartornera taallersimaassanngikkaa.

EU-mi Kommissionip aalajangiusimavaa 2020 nallertinnagu nunat EU-mut ilaasortat silaannarmik toqunartumik CO2-mik aniatitsinertik tallimararterummik millisereersimassagaat. Barossop eqqaavaa USA-p CO2-mik aniatitsinerujussuami annikillisaaffiginiarlugu nalunaarutaa EU-p akortariaqaraa.

Naak nunarsuarput tamakkerlugu aningaasarliorneqaraluartoq, taamaattoq pinngortitaq puiguinnarneqarsinnaanngitsoq tuluit ministeriunerata Gordon Brownip nassuerutigaa.

EU-mi nunat ilaasortat pinngortitap illersortariaqarneranik oqariartornerat danskit pinngortitaq pillugu ministeriata ilalerpaa oqarami pitsanngorsaaniarnerit aningaasarsiornermut ajoqutaanatik iluaqutaaginnassasut.