Barfoed konservativet siuttorilerpaat

Lene Espersen siulittaasutut ippassaq tunuarpoq.

Konservativet folketingimi gruppeata tatigaluni siulittaasutut qinersimammanni, ullumi tusagassiortunik katersortitsinermi Lars Barfoedip nuannaarutigalugu oqaatigaa. Siulittaasutut qinigaanera akisussaaffimmik annertuumik nassataqarpoq, Lars Barfoed oqarpoq. Konservativet partiiata iluanni sivisuumik ajornartorsiortoqareerpoq, qinersisartut isumasiorneqarneranni qinersisoqassagaluarpat tapersersortigisinnaasavut kissaatigisatsittut amerlatiginngillat, taammatumik konservativenut tapersersuisut amerleriarnissaat anguniarlugu konservativet folketingimi gruppeanni partiilu ataatsimut isigalugu annertuunik suliassaqarpugut, Lars Barfoed oqarpoq.

Konservativet partiiata politikkia Lars Barfoed-ip siulittaasunngorneratigut ingerlanneqaannassaaq aammalu akileraarutinik annikillisaanissaq qineqqusaarutigineqassasoq Lars Barfoed-ip naqissuserpaa.

Lars Barfoedip politikkikkut siuttunngornermini Lene Espersenip akisussaaffigisai allat marluk aamma tigusussaavai. Tassa Ministeriunermut tullersortaalerlunilu naalakkersuisut ataqatigiissaarinermut ataatsimiititaanni ilaasortanngussaaq.

Ministeriuneq Lars Løkke Rasmussen Barfoedilu nalunaaqutaq qulit qaangilaarnerani ataatsikkut tusagassiortunik katersuutsitsinerminni, siunissami suleqatigiinnissartik qilanaarinerarpaat. Ministeriunerlu ilaatigut oqarpoq, Lars Barfoedilu ukiorpassuani ilisimasariinnikuullutik, imminnullu nalungilluaramik suleqatigiilluarnissartik qularinagu.