Bardot puisinik illersueqqilerpoq

Franskeq arnaq isiginnaartitsisartuusimasoq, uumasunillu illersuiniartoq 71-nik ukiulik Brigitte Bardot Canadami tusagassiortunik ippassaq katersortitsivoq. Brigitte Bardot qiaatigaluni Canadamiut naalakkersuisuinut qinnuteqarpoq akissarsiutigalugu puisinniartarneq unitseqqullugu. Taama Canadami aviisi The National Post allaaserinnippoq.

Brigitte Bardotip Hotel-iata silataani ilinniartut Nunavummiut akerliussutsimik takutitsipput kamilerlutik. Akerliussutsimik takutitseqataavoq Nunavut ilinniartitaanermut naalakkersuisua Edward Picco.

-Ilinniartut uku pissutsinik akuersiinnarusunngillat, Brigitte Bardot-ilu puisinniarnermut tunngasunik sianigisaqanngilaq. Picco oqarpoq.

-Toqutinnanga, puisinik toqaraanerup unitsinneqarnera takorusuppara, Brigitte Bardot oqarpoq. Assaminik kiinnani asserlugu qiavoq tunuanilu isginnaarneqarsinnaavoq puiseeqqanik toqulersunik videoliaq, inuttaatalu qiviarsinnaannginnerarpaa.

Canadap ministeriunera Stephen Harper, aalisarnermullu ministeri Loyola Hern Bardotip naapikkusussimagaluarpai itigartinneqarsimallunili.

Bardot kingullermik Canadamiippoq ukiut 30-ngajaat matuma siornagut, puiseeqqanik toqoraanermik taamani aamma unitsitsiniaavoq.