Barack Obama unnugu oqalugiassaaq
Demokratit Denverimi ulluni sisamani ataatsimeersuarneranni Obamap præsidentingorniarnissaanut soraarutigineqarnerata persuarsiutigineqarnissaralua manna tikillugu Clintonikkut saqqumilaarnerujussuannit inangersimaarneqarpoq. Clintonikkut suliassatik suliarigaluarpaat, tassa Obama nersualaarpaat tapersersorlugu, unammisassaalu McCain saassutaralugu. Taamaakkaluartoq Clintonikkut ilisarisimaneqarluaramik pingaartinneqaqaat, Obamalu aatsaat imminut ilisaritinniartalerami salliuniarnissani ajornartorsiutigilaarsinnaavaa. Taamatut Jeff Grainfield TV-qarfimmi CBS-imi tusagassiortoq naliliivoq.
- Manna tikillugu ajunngitsumik ingerlavugut, ilaa?, Barack Obama unnuaq ataatsimeersuartut 4500-t tupaallatsilaarlugit qaqilluni suaarpai. Ataatsimeersuarnerli Obamap ilaqutaasalu ilisarisimaneqarnerulernissaat anguniarlugu aaqqissorneqarsimagaluarpoq. Unnuguli Obamap oqalugiarnissaa apeqqutaassaqaaq, Obamammi aamma oqalugiarnissani arsaattarfisuarmut nuussimavaa 70.000-illu pallillugit tusarnaartoqarsinnaalluni. Taamaammat isumalluartut pakatsisinnaveersaartussaavai, Clintonikkullumi unnugu salliutinneqarnavianngillat.
