Barack Obama Oslomi ullumi nersornaaserneqassaaq
Tamatuma persuarsiornartumik nalliuttorsiutigineqarnissaa pilersaarutaavoq, ilaatigut Norgip kunngia Harald ulloqeqqasioqatigineqassalluni, ileqquusorlu najoqqutaralugu Nobeli eqqaaniarlugu tusarnaartitsisoqartussaavoq.
Kisianni Obama aaqqissuussinernut taakkununnga marlunnut peqataaniarnani nalunaarsimavoq, tamanna Norgimiut ajuallaatigisimaqigaat, aviisimi Jyllands-Postenimi taama allaaserinnittoqarpoq.
Isumasiuinerup nutaap ersersippaa, innuttaasut 53 procentiisa, Obamap tusarnaartitsinermut peqataaniannginnera inussiarniillisaarnerusoq. Obamallu kunngi Haraldimik ulloqeqqasioqateqarusunnginnera aperineqartut 44 procentiisa naammaginngilaat.
- Qanoq amerlatigisunik qujaannarnissat taamaatitsiinnarnissallu killeqarput, taamaaliuinnaleruimmi pingaakujuttutut isigineqalissagavit, Norgimiu ussassaarinermut immikkut ilisimasalik oqarpoq.