BankNordikip coronap ajornartoortitsinera aamma malugigaa
Savalimmiormiut aningaaseriviata BankNordikip, Kalaallit Nunaanni immikkoortortaqarfeqartup, ilanngaatissat ilanngaatigereerlugit 2020-mi naatsorsuutaasa inernerni 166 millionit koruuniupput, ukiup siulianut naleqqiullugit appariarnerulluni.
Suliffeqarfiup ukiumoortumik naatsorsuutaani tamanna takuneqarsinnaavoq.
Suliffeqarfiup 2019-imi inernerinut naleqqiullugit 2020-mi inernerit taamaasillutik 41 millionit koruuninik appasinnerupput, 2019-imi 207 millionit koruuniummata.
Naak ukioq 2020 coronamit ajornartorsiorfisimagaluartoq suliffeqarfiup inernerit naammagisimaarutigai. BankNordikip Danmarkimi immikkoortortaqarfini ukiup ingerlanerani tunivai, tamanna akileraarutit ilanngaatigineqannginneranni 55 - 70 millionit koruuninik isertitsiffiulluni.
Kalaallit Nunaanni sullitat amerleriartut
Suliffeqarfiup Kalaallit Nunaanni immikkoortortaqarfia niuernikkut ingerlalluarnerulersimasoq BankNordikip pisortaanerata Árni Ellefsenip nuannaarutigaa:
- Kalaallit Nunaanni niuernikkut ingerlalluarnitsinnut pingaarnertut pissutaavoq ukiup ingerlanerani nutaanik sullitaqalersimanerput, aammalu taarsigassarsiarititatta amerlisimanerat, Árni Ellefsen, tusagassiutinut nalunaarummi oqarpoq.
AAMMA ATUARUK Grønlandsbanken umiatsiaararsortunut taarsigassarsititsisarunnaartoq – Bank Nordik suli ammatitsivoq
BankNordip Kalaallit Nunaanni siorna 2020-mi kaaviiaartitai 61,1 millionit koruuniupput, 2019-imi 49,5 millionit koruuniullutik.
BankNordikip Savalimmiuni siorna kaaviiaartitai 2,8 milliardit koruuniupput.
BankNordikip Kalaallit Nunaanni siorna 2020-mi taarsigassariatitai 971 millionit koruuniupput, 2019-imi 844 millionit koruuniullutik.
Ilanngaatissat ilanngaatigereerlugit 2021-mi naatsorsuutit inernerat katillugit 150-200 millionit koruunit missaaniinnissaat BankNordikimi siulersuisut naatsorsuutigaat.