BankNordik naatsorsuutitigut angusarissaarpoq
Siuariarnermut pissutaasut marluupput. Nunatsinni aningaasat taarsigassarsiaritinneqartut 120 millioner koruuninik amerleriarput procentinngorlugu 16 procentiulluni. 2012-mi qaammatini siullerni qulingiluani taarsigassarsiaritinneqartut 756 millioner koruuniniit 876 millioner koruuninut amerleriarsimapput. Taakku saniatigut aningaaseriviup sulisunut allaffissornermullu aningaasartuutini ikilisarsimavai.
- Sinneqartoorutit 5 millioner koruuniniit marloriaatinngorlutik 10 millioner koruuninngornerata takutippaa Ilulissani Sisimiunilu immikkoortoqarfiit matunerat isumatusaarnerusoq. Allatut oqaatigalugu sullitavut oqaraasuaatikkut sukumiisumik siunnersortarpagut najorlugit ilaannakortumik siunnersornagit. Suleriaaseriligarput sullitatsinnit ilassilluarneqarmat assut tulluusimaarutigaarput, BankNordikimi immikkoortumi pisortaq Bjartur Nolsøe KNR.gl-mut oqarpoq.
BankNordik ukiormanna qaammatini qulingiluanilu amerliartuinnartunik sullitaqaleraluartoq suli sullitassat nutaat inissaqartinneqarput. Sullitallu amerliartuinnassappata sulisut amerlineqarsinnaanerat piareersimaffigineqarpoq.
- Inuiaqatigiinni saqqumilaarnerunissarput ilungersuutigisimavarput tamannalu iluatsilluarpoq. Siunnersuillaqqissutut ilisimaneqalerusuppugut tamanna ukiuni makkunani aningaaseriviit suliaanni pingaarutilittut inissisimammat. Sullissatta namminneerlutik naammassisinnaasaat amerliartorput taamaasillutalu uagut siunnersuineq aallunnerulersinnaallugu. Inuiaqatigiinni aningaasarsiorneq pitsaasuummat aningaaseriviup aningaasaqarniarnera pitsaasuuvoq taakku ingerlaqatigiikkajuttarmata. Suli siuariartornerunissarput naatsorsuutigaarput sullitat amerlinerisa malunniutaat suli takussaanngimmat, Bjartur Nolsøe oqarpoq.
