Bankit KNI-mut killissartik naammagilerpaat

KNI-p ingerlanneqarneranut ukiup affaanut amigartoorutaasut 75 mio. koruunit KNI-p attavigisartagaanut bankinut aalassatitsisimaqaat, tassami allaat qummut killiliussassatut atukkiussassat unitsinneqarsimapput. Taamalu aningaasat ilumut taarserneqarsinnaanerat apeqquserlugu qularnaveeqqummik Namminersornerullutik Oqartussanut bankiniit piumasarineqarsimavoq.

Tamakkulu tassa tunngavigalugit KNI-p siulersuisortaavi aqutsisoqarfialu aningaasaliisartunut atukkiisartunullu aallaqqaataaniit isumaqatiginninniartussanngorsimasut, aviisip Sermitsiap nittartagaani allaaserineqarpoq.

Siulersuisut siulittaasuat Simon Olsen Sermitsiamut ilisimatitsivoq, qummut killiliussassatut atukkiussassat unitsinneqarnerat KNI-p aningaasaatitut tigoriaannagassaanut tamaviaartitsilersoq.

- Ilumoorpoq ukiup affaanut naatsorsuutinut amigartoorneq pissutigalugu bankit atukkiisartugut aalassammata. Taamaattumillu bankinut isumaqatigiissutigisimasagut aaqqinniarsaralugit isumaqatigeqqinniartariaqarpavut, Simon Olsen oqarpoq.

Taamatuttaaq KNI-p ataaniittut allamilli aqunneqartut tassa Arctic Green Food kiisalu Umiarsuaateqarfik Assartuivik Simon Olsenip aaqqiissutissamik ujartuivigilerai oqaatigineqarportaaq.