Bangladeshimiit qimaasoq Qaanaamiit pisuinnaq Canadaliariaraluarpoq

Pituffimmi politiit immikkuullarissumik misigisaqarput, angut nunani kiattuni Bangladesh-imeersoq, Hamidur Rahmann, qimaalluni Qaanaamiit qimussiutseriarluni pisuinnaq Canadamut ikaariaraluartoq naammattooramikku.

Hamidur Rahmann, nulia, ernerallu pingasunik ukiulik politikki pillugu 2004-mili Tysklandimiilersimapput, qimaasutulli akuerineqannginnamik, Malaysiamut marsip qaammataani utertinneqarsimallutik. Hamidurili Canadamukarusulluinnarsimavoq, taamaammat, Danmarkimiit Savalimmiunut Savalimmiuniillu Islandimut Pituffimmullu timmisartorsimavoq, Qaanaamiillu qimussiutsitsiarsinnarluni, angut taanna kisimiilluni pisuinnaq Canada-mut ikaariaraluarsimalluni.

Pituffimmi politeeqarfimmi stationslederi, John Hansen, suliamik taamaattumik takusimanngisaannartoq, ima oqaluttuarpoq:

- Aatsaat taamak nunatsinni pisoqarpoq. Tassami taanna qimaasoq immikkuullarissumik ilioriaraluarsimavoq, tassalu nunatsinniit Canadamut pisuinnaq ikaariaraluarsimalluni. Nunatsinniit Canadamut pisuinnaq ikaarneq maannakkorpiaq ajornarpoq, tassami siku aserortereerami, Pituffimmi stationslederi, John Hansen, oqaluttuarpoq, nangillunilu:- Angutip taassuma pisuinnarluni Canadamut ikaarnissaq siunertarisimagaluarpaa. Nunamillu assilisat misissorsimavai, angutillu taassuma takusinnaasimavaa Canadami nunaqarfik Resolutbay-imiittoq pisuinnaq tikinneqarsinnaasoq. Hamadur Rahmannip inuunini navianartorsiortissinnaallugu nalusimanngilaa, taamaattorli ikaariaraluarluni.

Hamadur Rahmann, sikukkut pisuinnartilluni imaanut isissimavoq, nunamullu qaqisinnaasimalluni. Nunamiit aalaterisoq, Air Greenlandimeersumit qulimiguulimmit nassaarineqarsimavoq, Pituffiliaanneqarsimallunilu.

Nunatsinni eqqartuussiviup aalajangernera naapertorlugu, Hamidur Rahman, 30-nik ukiulik, nunatsinniit anisinneqassaaq.