Bangladeshimi pisortat ikioqqupput

Bangladeshimi kiattup anorersuata sakkortoorsuup sapaatip akunnerata naanerata siuninnguagut eqquinerata kingornagut oqartussaasut iluarsaassileruttorput – nunarsuarmioqatigiinnullu maanna ikiorneqarnissartik qinnutigaat.
Allattoq Elisa Isaksen
novembarip 20-at 2007 07:08

- Nunarsuarmioqatigiit ikiuunnissaat maanna tikilluaqqusorujussuussavarput. Sapinngisarput naapertorlugu iliuuseqarpugut, naalakkersuisut taama nalunaaruteqarput.

Naalakkersuisut ilanngullugu oqaatigaat, ikiuutissat soorlu toqqit, qaqorteqqasut imerlu inunnut tuusintilikkaanut qimaasariaqarsimasunut apuunniarnerat ajornartorsiutaaqisoq.

Kiattup anorersua ukiut qulit kingulliit ingerlaneranni aatsaat taama sakkortutigisoq Bangladeshimik eqquivoq, inuillu qassit manna tikillugu ajunaarsimanersut aseruinerillu qanoq annertutiginersut suli oqaatigineqarsinnaanngilaq.

Pisortatigoortumik nalunaarutigineqartut naapertorlugit 3.100-t ajunaarsimanerarneqarput. Kisianni ikiuiniaqatigiiffiit oqaatigaat 10.000-it sinneqartut kiattup anorersuata sisamanngormat tallimanngormallu aseruineratigut ajunaarsimanissaat ilimagineqartoq.

Anorersuup aseruineri annertoqaat inuillu tuusintilikkaat pigisatik tamaasa annaavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq