Bangladeshimi immap qaffakkiartornera navianartorsiortitsivoq

Nunarsuarmi nunat inuttunersaasa ilaanni inuit 20 milliunit nutaamik angerlarsimaffissarsiortariaqalersinnaapput. Misissuinerup tamanna takutippaa.

Ulussaarsuup Ailap maajimi sinerissamik aqqusaarinerani sumiiffiit qarsutsiffiusut ilaanni Shumtuk Kartung najugaqarpoq.

Inuuniarneq sussaanngilaq, naami najugaqarneq ajornakusoorpoq taanna oqaluttuarpoq. Inuit Bangladeshimi najugaqartut tusintilippassuit assigalugit nunami maanna maralluinnarmik taaneqarsinnaasumi taanna najugaqarpoq. Suna tamarmi quasarpoq.

Environmental and geografic information servicep qitiusoqarfia malillugu tamanna suli ajornerulissaaq.

Nunamimi asiap kujasissortaaniittumi inuit 20 milliunit inuuniarnikkut toqqammaviat silap pissusaata allanngornerata ulorianartorsiortippaa. Inuppassuillu nunap ilaanut allamut nussulerneranni tamanna kinguneqarsinnaavoq, taama oqarpoq tusagassiinermik ilanngutassiisartoq namminersortoq Lotte Ladegaard ukiorpassuarni ineriartornermik malinnaasimasoq.

Bangladeshimiut uteriitsuupput assigiinngitsunillu naammattuuisarlutik. Nunaataalli ukiup annersaani immap ataaniittarpata taava sumiiffinni allani najugaqalernissaq ujartortariaqalersussaavaat.

Kisianni taama iliornissaq Bangladeshimi ajornaatsuinnaanngilaq.

Nuna Danmarkimit pingasoriaammik anginerusoq pineqarpoq inuillu 150 milliunit tamaani najugaqareerput. Illoqarfiillu pingaarnersaat Dhaka, milliunit affaanniit milliunit tikillugit suliffissarsiortunik ukiumut inuttuseriartarpoq. Taamaammat saariarfissanik allanik soqarpallaanngilaq inuuniutaasinnaasullu amigaataallutik.

Taamaammat silap pissusaata allannguutaanik akiuiniarnermut nunat pisuut aningaasaqarnikkut ikiorsiissuteqarnissaat Bangladeshimit qinnutigineqarpoq.