Bangladeshimi gassimik qaartoortoqarmat inuit 16-it ajunaartut

Bangladeshimi muslimit qinusarfiisa moskét ilaanni gassimik tallimanngornermi unnukkut qaartoortoqarmat inuit 16-it ajunaarput, taakkunannga meeraq ataaseq. Inuit allat ikinnerpaamik 45-t aqqunartiterput.

Bangladeshimi oqartussat taama nalunaaruteqarput.

Moskép eqqaani gassinut ruujorit ilaannit gassimik aniasoqarsimanissaa qatserisartut isumaqarput taamaalineranilu qaartoortoqarsimassagunartoq.

Inuit arlallit Bangladeship illoqarfiisa pingaarnersaanni Dhakami qaartoortoqarnerata kingorna napparsimmaviliaanneqarput, amerlanerillu uutitingaatsiarsimallutik.

AAMMA ATUARUK Indiami Bangladeshimilu anorersuarujussuarnerani inuit 84-it ajunaartut

Napparsimmaviliaanneqartut amerlasuut akornanni aqqunartitingaatsiarsimammata ajunaartut amerlisinnaanissaat Bangladeshimi oqartussat ernummatigaat.