Bangkokimi ullumi sorsuttoqannguatsiaannarpoq

Eqqaassinerit, ikuallatsitsinerit, tallimat toqutaasut 50-inillu amerlanerusut ikiligaallutik.
maajip 19-at 2010 17:34

Bangkokimi eqqaanilu nunap immikkoortuini aqqaneq-marluusuni tappavani nalunaaqutaq najoqqutaralugu unnukkut arfineq-pingasunut anisoqaqqusiunnaarnera nalunaarutigineqarpoq, Thailandimilu sakkutuut inerteqquteqarneq maleruarneqarnersoq nakkutigalugu.

Ullormi ataatsimi aneqqusiunnaarneq naalakkersuisut tungaannit innuttaasut imminnut sorsuunnerisa sakkortunerpaaffiattut oqaatigineqarpoq. Sorsuttoqarneranullumi assingusumik iliortoqarpoq, aqqusinerniittoqarluni kingornalu sakkutuut pisuinnaat qamutillu sorsuutit takkullutik. Qallunaat nalunaaqutaat najoqqutaralugu ullaaq taakkua isaapput akerliussutsiminnik takutitsisut assiaqutsiussaat pitarlugit. Tallimat toqutaapput 100-llu arlallit ikiligaallutik, taakkua amerlanersaat akerliussutsiminnik takutitsisuullutik. Aappaluttunik ilullillit akersuunnerat sakkortunerpaaq pivoq taakkua pisortaat arfineq-marluk politiinut tunniutiinnarniarlutik aalajangereersullu. Tamanna aamma aappaluttunik atisallit arlallit tunniutiinnarnerannik kinguneqarpoq. Kisiannili akerliussutsiminnik takutitsisut allat 3.000-it maattunerusut taamaaliunngillat. Akerliussutsiminnik takutitsisut illunik arlalinnik ikuallatsitsisimasut najukkami tusagassiorfiit oqaatigaat, tamatumani ilaatigut aningaaserivik tv-qarfillu, aammattaarli inuinnaat illui ikuallatsinneqartarsimallutik. Naalakkersuisut tv-kkut aallakaatitassiat nakkutigineqarnerannik kiisalu tappavani nalunaaqutaq arfineq-pingasut kingornagut aneqqusiunnaarnermik akisipput. Naallu aneqqusiunnaartoqaraluartoq, illoqarfiit pingaarnersaanni pissutsit suli nalorninartoqarput. Tamatumani aallartitaqarfiit arlallit, ilaatigut Danmarkip aallartitaqarfiata, aallartitaqarfitik matoorarpaat sulisullu qimarngussortillugit. Sulili akerliussutsiminnik takutitsisut maattunerusut sakkutuullu imminnut aporaannissaat ilimanarpoq. DR-ip Asiami tusagassiortuanit Jan Larsenimit nalunaarutit kingulliit taamaapput.