Bangkokimi suli eqqissiviilliorput

Thailandimi illoqarfiit pingaarnersaanni Bangkokimi suli eqqissiviilliortoqarpoq. Ministeriuneq Abhisit Vejjajiva sakkutuullu naalagaasa ilaat sakkutuut illorsuaasa ilaannut imminnut illersorniarlutik ungalusimapput, inunnik tuusintilikkaanit ungusaallutik.
Allattoq Mads Lynge
marsip 15-at 2010 16:05

Ministeriuneq tunuarumannngittuarsinnarpoq, tunuarpat eqqartuunneqarnikumit Thaksin Shinawatramit taarserneqarnissaa akerliussutsiminnik takutitsisut piumasarimmassuk.

Eqqarpalunnerit qaartartumeerinerillu tusarsaapput, takornariallu akerliussutsiminnik takutitsisunut ornigutinnginnissaat kajumissaarutigineqarpoq, Nutaarsiassaqartitsivik Ritzau taama allaaserinnippoq.

Danmarkip nunanut allanut ministereqarfia ippassaq taama kajumissaaruteqarpoq, akerliussutsiminnillu takutitsisut pillugit danskit takornariat alaatsinaattuarnissaat kajumissaarutigineqarluni.

Inuit eqqissiviilliornerni peqataasut qassiunerat eqqoriarneqaqattaarpoq, inuit 150.000-it pallillugit peqataanerat eqqoriarneqartarluni.

Sakkutuut 50.000-it sillimatinneqarput. Akerliussutsiminnik takutitsisut Thailandip avannarpasinnerusortaaneersuunerupput, inuit tamaani najugallit Thaksin Shinawatramik annertunerusumik tapersersuisuullutik.

Thailandimi sakkutuut 2006-imi mumisitsimmata Thaksin taamanikkut tunartinneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq