Bangkokimi suli akersuuttuarsinnarput
Ulloqeqqata siornagut sakkutuut Bangkokip qeqqani akerliussutsiminnik takutitsisunut piffissaliussaat qaangiuppoq. Naalakkersuisut ilimagaat akerliussutsiminnik takutitsisut 5.000-it missaanniittut suli tamaaniissasut aammalu ulloq unnuarlu qaangiuttut inuit 35 toqutaasimasut.
Maanna akerliussutsiminnik takutitsisut sapaatit akunnerini arfinilinngulersuni tiguarsimasaat ullumikkullu qimaqquneqartoq 100 meterialunnguanik ungasitsigalugu ippunga. Oqaatigeriikkattut piffissaliussaq qaangiuppoq, sulili tamaaniittoqaqaluni. Maannakkut utaqqisaat imaannguatsiarpoq sumik pisoqalernersoq sakkutuullu sunialernersut.
Tamatuma sakkutuunit saassunneqarnissaa qanoq annilaanganartiginersoq Christina Lund Sørensen aperineqarami akivoq:
- Annilaanganakujuppoq, tassami sakkutoorpassuit tamaaniimmata, maannakkorpiaq Bangkokimi sakkutoorpassuupput, ullunimi kingullerni akerliussutsiminnik takutitsisunut akiuillutik ulapputeqarsimapput. Apeqqutaavoq ullumi tamanna pissanersoq, qaqugu qanorlu pissanersoq, taavalu manna qanoq pineqassava, akerliussutsiminnik takutitsisut uninngaarfiat atorunnaarsinneqassava, tamanna Bangkokimut tamarmut siaruaatissava, taavalu aamma eqqissiviilliornerit allat illoqarfiup ilaani allami pilissappat?, DR-imit Christina Lund Sørensen Kaj Sellikenimut oqaluttuarpoq.
