Bangkokimi pissanganartorsiornerit annertusipput

Bangkokimi illoqarfiup qeqqani sakkutooqarfik qaartartunik miloriuttakkanik sakkulinnit saassunneqarpoq, sakkutuullu marluk ikilerneqarlutik. Akerliussutsimik takutitsisut 80.000-it missaanniittut Thailandimi naalakkersuisoqarfiup tungaanut ingerlaaleruttorput.
marsip 15-at 2010 11:53

Qaartartunik miloriuttakkanik saassussinermik nutaarsiassaq Thailandimi tv-kkut erniinnarluinnaq aallakaatinneqarpoq, sakkutooqarfillu politiinit pinerluttorsiortunit misissorlugu aallartinneqarluni, tassami saassussinermut kikkut tunuliaqutaanersut, tamannalu sap. akunnerata naanerani ullumilu naalakkersuinikkut pisortamut Abhisit-imut akerliussutsimik annertuumik takutitsisoqarneranut toqqaannartumik attuumassuteqarnersoq iluamik ilisimaneqanngimmat.

Qaartartulli Abhisit-ip akerliussutsimik takutitsisut inatsisartut atorunnaarsinneqarnissaannik qinersisoqarnissaanillu piumasaqaataannik tv-kkut itigartitsiluni saqqummiussinerata kinguninnguagut qaartinneqarput.

Naalakkersuisut atugarissaarnerusunut sinniisuupput ileqquusumillu sakkutuunit tapersersorneqarlutik, akerliussutsimilli takutitsisut tassaanerullutik Thailandip avannaani piitsut nunaannarmiut, taakkualu qinersisoqarnissaa kissaatigaat nuannaartorisarsuarmillu, tassalu pisoorsuup tusagassiorfinnillu piginnittup Thaksinip uteqqinnissaa neriuutigalugu.

Thaksin Thailandimi ukiuni tallimani naalakkersuisuusimavoq 2006-imi sakkutuut peqquserluttuliortoqarnera pissutigalugu pissaanermik tigusineranni peersinneqarnissami tungaanut.

Bangkokip qeqqani qaartartummerilluni saassusisoqarnerani ullumikkut akerliussutsimik takutitsisut illoqarfiup avataatungaani sakkutooqarfimmut ingerlaarput, ajornartoortoqarnera pissutigalugu naalakkersuinikkut pisortap Abhisit-ip najugarigallagaanut.

Taassuma akerlerisaasa aappalaartunik atisalerlutik akerliussutsimik takutitsisut 100.000-illit aaversinnissaannik pisortatigoortumillu naalakkersuisut illorsuata saavanut aamminnik aqagu miloriusseqqullugit sioorasaaripput. Tamakkua tamarmik tassaapput nakuuserani naalakkersuisunillu sapinngisamik qasutitsiniutigineqartut naggaataatigullu Abhisit-ip pinngitsaalillugu tunuartinnissaanut iliuuseqarnerit.