Bang-ip assilisimasai saqqummersippaat

Danskip assiliisartup Jette Bangiugaluup nunatsinni assilisai alutornarluinnartut, Kinaana-mik taaguuserlugit Københavnimi Kalaallit Illuanni Løvstrædemi saqqummiunneqarput. Eskimologip, Leise Johnsenip, ukiorpaalunni Jette Bangip suliaanik misissuisinnarluni saqqummersitsineq suliniutigisimavaa.

- Assit isiginnaarlugit nuannersorujussuupput oqaluttuartutullusooq isikkoqartaramik, soorlu assersuutigalugu aana aanama assinga. Upernavimmiit Aasiannut sakiallulluni anaananga naartooralugu katsorsartikkiartorpoq. Taamaattumik assit pingaaruteqaqaat, Leise Johnsen taama oqarpoq.

Københavnimi assinik saqqummersitsineq upernaallu ingerlanerani nunatsinni katersugaasivinni saqqummersitsinissat Leise Johnsenip suliutigai. Nunatsinni katersugaasivinni assit saqqummersinneqartussat 1936-miit 1962-p tungaanut illoqarfinni assigiinngitsuni assilisaapput taamaattumik saqqummersitsisussap neriuutigaa qanga pisimasut innuttaasunik eqqaasitsiumaartut.

Jette Bang 1936-imi siullermik nunatsinnut tikippoq. Taamaanikkut 22-inik ukioqarpoq Københavnimilu assiliisartutut naammasseqqammerluni. Innuttaasut nuannarilerpai, kiisalu pinngortitamik atuinerat inooriaasiallu nuannarisorujussuanngorlugit. Tamatuma kingorna arlaleriaqaluni nunatsinnukartarpoq, tamanna aamma assinik 12.000-inik isiginnaarnermi takuneqarsinnaalluarpoq.

Leise Johnsenip immikkut ittumik Jette Bang sammillugu allaaserinikuuaa assiliisartumillu nuannarinninni isertuutinngilaa:

- Inuit inooqatigisani qanimut assilissallugit pikkoriffigilluinnarpaa. Qaamaneq atorluarlugu torrallaavillugit assilisarpai. Assilissut qanoq atussallugu nalunngilluinnaramiuk torrassuarnik assiliisarpoq. Ukiunilu arlaqartuni immikkut samminikuugakku nuannarivippara, Leise Johnsen taama naggasiivoq.

Jette Bangip assilisimasaasa tammatsaaliorneqarnissaat aallaavigalugu assinik saqqummersitsoqarpoq. Assit nittartakkami www.arktiskebilleder.dk takuneqarsinnaapput saqqummersitsinerlu pillugu annerusumik nittartakkami www.kinaana.net atuartoqarsinnaalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat