Banaanit iipilillu akisuut

Illoqqortoormiunut nioqqutissanik pilersuineq iluarseqqullugu illoqarfimmi Inuit Ataqatigiit naalakkersuinermik suliaqartunut suaaruteqarput. Kisianni umiarsuit arlaqarnerusut tikittalissappata, tamanna angallassinermut akinut sunniuteqassasoq, RAL naliliivoq.
maajip 11-at 2010 12:30

Illoqqortoormiuni iipili ataaseq 15 koruuneqarpoq - appelsiina ataaseq 20 koruuneqarluni.

- Innuttaasut peqqissuussappata nioqqutissanik pilersorneqarneq pitsaanerusariaqarpoq. Isumaqarpugut nioqqutissanik pitsaasunik inuussutissartaqarluartunillu pisisinnaaneq innuttaasunut tamanut tunngaviatigut pisiinnaatitaaffiusariaqartoq, IA-meersoq Juulut Danielsen taama allappoq. Taanna oqarpoq islandimeersunik paarnanik naatitanillu akisuunik pilersorneqarlutik.

- Tamanna ilaqutariit isertitakinnerusut akissaqartinngilaat, naak taakkua meeqqatik nerisassanik peqqinnartunik pilersortussaaniaraluaraat, taanna taama uparuaavoq.

Taamaattumik isumaqarpoq qangaaniilli ukiumut marloriarluni umiarsuaqartarneq misissoqqittariaqartoq.

- Silap allanngoriartornera pissutigalugu siornatigorninngarnit sikuijaarnerusalerpoq, taamaammallu tamanna siusinnerujussuakkut umiarsuaqartalernissatsinnik kinguneqartariaqarluni.

KNI-p Naalakkersuisullu kissaatigippassuk Illoqqortoormiut umiarsuakkut angallavigineqarnerat oqaluuseralugu aallartissinnaalluarneqartoq, Royal Arctic Linemi tusagassiisarnermut pisortaq Jakob Strøm oqarpoq.

- Angallassinerulli annertusinissaa akisuujuvoq umiarsuillu angalanissaannut pilersaarutip allanngortinnissaa piffissartornartuulluni, taanna taama oqarpoq.

- Illoqqortoormiut maannamut marloriarluni tikinneqartarnera massakku kiffartuussinermik isumaqatigiissummi aalajangersarneqarsimavoq. Umiarsuit arlaqarnerusut illoqarfimmut tikittalissappata, tamanna Kalaallit Nunaanni angallassinermut akinut sunniuteqassaaq, Jakob Strøm oqarpoq.