Ban Ki-Moon FN-imi qullersanngorpoq

Nunarsuarmiut ukiuni qulini FN-ip qullersaa Kofi Annan sungiusimareerlugu, qullersaq nutaaq sungiunniartussanngorpaat.

Korea Kujallermiu Ban Ki-moon Naalagaaffiit Peqatigiinni ataatsimeersuartut katersuunneranni FN-imi qullersatut ivertinneqarpoq.

Peqatigitillugu katersuuttut Ghanamiu Kofi Annan nersorniarpaat.

62-inik ukiulik Ban nunamini nunanut allanut ministeriugaluarpoq. Ukiortaamiit FN-ip qullersaatut sulinini aallartissavaa. Nunarsuaq tamakkerlugu suliniaqatigiiffimmi qullersatut ukiuni tulliuttuni tallimani atuutsissaaq.

Ban Ki-moon neriorsuivoq ataqatigiissitsisuujumalluni, FN-ilu sulisinnaassusilik sapiissusilillu siulersorusullugu.

- FN-imi pingaartitatta pingasuusut nukittorsarnerisigut – tassaasut isumannaatsuuneq, ineriartorneq aamma inuit pisinnaatitaaffii – kinguaariinnut tulliuttunut nunarsuaq eqqissisimanarnerusoq, siuariartornerusoq naapertuilluarnerusorlu pilersissinnaavarput, Ban nunat ilaasortaasut 192-iusut aallartitaannut immikkullu qaaqqusanut oqarpoq.

- Anguniakkatta taassuma anguniarnerani siulliullugu tatigeqatigiinnerup pilerseqqinneqarnissaa anguniarniarpara. Pitsaasumik inooqatigiinnissamik pingaartitsisutut ataqatigiissitsisutullu pissusilersorniarsarissaanga, Ban oqarpoq.

Ilanngullugu oqaatigaa FN nunarsuarmiunit soqutigineerutissasoq “suliniuteqaranilu qunutuujuppat”.

Nutaarsiassaqartitsivimmit Ritzau-imit taama allaaserinnittoqarpoq.