Bamsit nanuaqqat tunissutigineqartut

Napparsimmavimmi uninnganeq misigisaasinnaavoq sakkortooq – ingammik meeraagaanni.
Allattoq Elisa Isaksen
juulip 25-at 2008 16:18

Taamaattumik Dronning Ingridip napparsimmavissuani sinitsitsinermut immikkoortortaqarfimmut bamsit nanuaqqat 50-it TELE-POST-imit tunniunneqarput.

- Bamsit nuannaarutigeqaavut, meerarpassuarnullu nuannaarutaajumaartut qularutiginngilluinnarpara. Meeqqat sinitsitaanerminninngaanniit iterneranni nuanniilliulaarallarnerannilu tuppallersaatigilaarsinnaasaannik tunisinnaallugit nuannerpoq, sinitsitsisartoq peqqissaasoq Jûana Hulgard oqarpoq.

- Uumasut annoraaminermit qituttumit sanaat meeqqat nappaamminnik sukkanerusumik qaangiinissaannut iluaqutaasinnaapput, meeqqammi bamsinik pinnguartillutik napparsimanertik ilaanni puigortarpaat. Bamsit tunniussavut iluaqutigalugit meeqqat ilaasa uninnganerat nuannernerulersinnaassasoq neriuutigaarput, TELE-POST-imi nittarsaassinermut ataqatigiissaarisoq Mai-Britt Ejby Villadsen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq