Baltimoremut nassiussanik nassitsisoqarsinnaassanngilaq
Nunatsinni allakkanik poortukkanillu nassiussisartut ikinngutitik nalunngisatillu Air Greenland Baltimoremut aappaagu timmisartuussisalerpat nassiussamik nassarneqarnissaat ilimagissanngilaat, TELE-p ingerlatsinermut ineriartortitsinermullu pisortaa Annette Jersholm taama nalunaaruteqarpoq.
- Nassiussiniarnerup allanngornissaa massakkorpiaq ilimaginngilarput. Air Greenlandip USA-mut timmisartuussisalerneratigut nassiussisarnissarput takorluunngilarput, Annette Jersholm oqarpoq, nangillunilu:
- USA-mut nassiuttakkat imminut akilersinnaanersut tamatumunnga apeqqutaavoq. Nunanut allanut, Danmark eqqaassanngikkaanni, nassiunneqartartut ikittuararsuupput. Air Greenland, Post Danmark USA-milu attaveqarfigisartakkavut soorunami oqaloqatigissavavut, nassiussisarnerli imminut akilersinnaanersoq apeqqutaalluinnassaaq, TELE-mi ingerlatsinermut ineriartortitsinermullu pisortaq oqarpoq.
Canadamut timmisartuussisoqartarallarmat misilittakkat naapertorlugit nunatsinniit kimmut nassiuttakkat ikittuararsuit Canadami akileraarutinik akiliisarneq peqqutaalluni nassiussisarneq imminut akilerpiarsinnaasimanngilaq. Post Danmark aqqutigalugu kimmut nassiussat sukkanerusumik taamanikkut nassiunneqartarput.
