Baltimore-imiit Kalaallit Nunaannut nalunaaquttap akunnialuinnannguani
Kalaallit Nunaata Amerikallu akornanni timmisartukkut toqqaannartumik attaveqalerneq malunnartinniarlugu, Namminersornerullutik Oqartussat nunattalu avammut nittarsaanneqarnissaanut suleqatigiiffik, Branding Greenland, qaaqqusisoralugit, aallartitaqarfimmi qaaqqusat 125-t missaanniittut nalliuttorsiualaarnermini peqataapput. Amerikami suleqatit, nunatsinnut attuumassuteqartut taavalu Danmark-imiit Kalaallit Nunaanniillu qaaqqusat nalliuttorsiornermi peqataapput, aallartitaqarfimmi sulisut ilaannit nalliuttorsiorneq iluatsilluartutut nalilerneqarluni.
Sermeq nunatsinneersoq annertooq aallartitaqarfiup silataanut inissinneqarsimasoq, taamatullu qimussit
qaaqqusanut tamussiussassatut sassaalliutigineqarput, Nuummi Hotel Hans Egede-mi igasumit, Jeppe Ejving Nielsen-imit, suliarineqarsimasut, aalisakkat neqillu nunatsinningaaneersut, iggisinullu ilaavoq immiaaraq nunatsinni maqinneqarsimasoq. Isiginnaartitsisartoq Vivi Nielsen qaaqqusat alutorsaatigilluagaannik uaajeerpoq, qaaqqusat qeratagaluarlutik quujatsatsinneqarluarlutik. Nalliuttorsioqataasut angerlakaalermata, tuttup saarnganik qiperukkamik tupilammik tunissuteqarfigineqarpoq.
Air Greenland-ip timmisartua Kunuunnguaq nunatsinniit siullermeerluni Baltimore-mi mittarfianut ippassaq tikimmat, mittarfimmi ilasseqatigiinneqarpoq, nunatsinniit tikittut, nunatsinnullu ilaasussat, peqataaffigisaannik. Baltimore-imi mittarfiup pisortaa, Air Greenland-ip pisortaanerisimasaa, Flemming Knudsen, nunanut allanut naalakkersuisoq, Lars-Emil Johansen, Air Greenland-illu siulersuisuini siulitaasoq, Julia Pars oqalugiarlutik.
Timmisartoq Kunuunnguaq Kangerlussuarmut ippassaq unnukkut qulingilua-qeqqa qaangilaara tikippoq, tikittullu alutorsaatigilluagaannik erinarsoqatigiit Danmark-imeersut, Aavaat, tikilluaqqusillutik erinarsorput, arnartaat kalaallisoorlutik angutitaat qaqortumik annoraamaarlutik.
Nunatta Amerikallu akornanni toqqaannartumik timmisartukkut attaveqalerneq naggaserlugu ippassaq unnukkut Kangerlussuarmi ilasseqatigiinneqarpoq