Balimi upalungaarsimaniarneq qaffakkaat
Qaqqarmi innermik anitsisartoq Agung innermik arfininngormat unnukkut anitsilerpoq, sapaatip-akunnerata ataatsip ingerlanerani aappassaa innermik anitsilluni.
Inuit qaqqamit minnerpaamik 10 kilometerinik ungasitsigisumiinnissaat Indonesiami oqartussat ullumimiit peqqussutigaat, qaninnerusumiittullu piaarnerpaamik qimagunnissaat piumasaralugu.
Qaqqap innermik anitsingaatsiarsinnaaneranut aarlerisaarisoqartoq atorfilittat ilaata franskit nutaarsiassaqartitsiviannut AFP-mut oqaatigaa.
Qaqqap innermik anitsisartumit qaartoqarpallattarnera 12 kilometerisut ungasitsigisumit tusaaneqarsinnaasut, Indonesiami upalungaarsimasut tuluit nutaarsiassaqartitsiviannut Reutersimut ilisimatitsissutigaat, qaqqallu innermik anitsisup qullaatsitai aamma takuneqarsinnaapput.
- Qaqqap innermik anitsinera unnuakkulluunniit takuneqarsinnaavoq, sakkortunerusumillu anitsisinnaanissaa taamaammat aarlerisaarutigineqarpoq, oqartussat taama nalunaaruteqarput.
Inuit 25.000-it missaat qaqqap qanigisaani najugallit qimagussorneqareerput.