Balimi puffassimaarput

Naalagaaffit peqatigiit Balimi ataatsimiinneranni inerniliussaq anguniagassanik tigussaasunik aarlerisaarutinillu imaarulluinnarneqarpoq.
Allattoq Mads Lynge
decembarip 13-at 2007 14:52

USA-p piumasaqarneratigut tamakku piiarneqarput, ataatsimeeqaqaatsunillu tamanna kamaatigineqaqaaq.

Nunat arlaqaqisut saqqummerput USA-lu toqqaannartumik isornartorsiorlugu nunarsuarmioqatigiit ingerlaqqinniarnerannik kinguarsaasuunerarlugu. USA-mi naalakkersuisut nunarsuarmioqataasunit kisimi isornartorsiorneqanngillat, tassami USA-mi naalakkersuinikkut suliaqartunit allanit aamma sakkortuumik isornartorsiorneqalerput.

USA-mi senatimi ilaasortat affaasa piumasaraat USA naalagaaffiit peqatigiit silap allanngoriartiorneranut iliuuseqarniarneranut unitsitsiniarnini taamaatissagaa. Isornartorsiuummut atsiortut ilagaat Præsidintinngorniartoq Hillary Clinton, John Kerry, kingullermi præsidentinngorniarnermi qinigaanngitsoortoq, Edward Kennedy, Barbara Boxerilu Senatimi avatangiisinut ataatsimiititaliamut siulittaasoq.