Bakteerissanut nakkutilliisoq nutaaq nassaarineqarpoq

Maannali aalisakkerivinni iluaqutissamik takkuttoqalerpoq, tassami atortut nutaaliat matematikkerluakkamik sanaat taamalu bakteerissanut inuussutissallu isumannaallisarnissaanut aqutilluarsinnaasut nassaarineqarput.

Danmarkimi Tekniske universiteti Royal Greenland suleqatigalugu matematikkerluakkanik arlalinnik nutaaliorpoq, taamaalilluni aalisakkerinermi bakteerissat ulorianaatillit sillimaffigineqarsinnaalertussanngortillugit, taama nittartakkat ilaat videnskab.dk allaaserinnippoq.

Atortuliap nutaap ilaatigut pisinnaasaraa raajat nioqqutissatut poortukkat bakteerissanik ulorianaatilinnik akoqalernaveersaartinneqarnissaat.

Danmarks Tekniske Universitetip taama angusaqarnera Royal Greenlandimiit nuannersutut tupaallaatigineqarpoq.

- Taamaalilluta pisisartugut nioqqutissiatta isumannaatsuunerannik qularnaatsumik uppernarsaateqartissinnaalerpavut, , Royal Greenlandimi atorfilik Inuussutissarsiorneq pillugu ilisimatooq Niels Bøknæs taama videnskab.dk-mi issuarneqarpoq.

Taassuma aamma erseqqissaatigaa tamatuma aamma Royal Greenlandimut piffissaajaataajunnaarnissaa.

- Nioqqutissanik ineriartortitsinitsinni piffissaajarunnaamissaagut, tassami taamaalilluta nioqqutissiatta ajortunngortinnaveersaarnerannut piffissaajartarnivut sivisusaqisut akisoqisullu pinngitsoorsinnaalerpavut, Niels Bøknæs oqarpoq.