kultureqarnermut naalakkersuisup Ane-Lone Baggerip pineqartup eqqortumik suliarineqarnera aalajangernerlu KNR-ip tusaatissatut tigummagu iluarisimaarpara,Assi: Pressefoto

Bagger: Unioqqutitsinerup kingorna eqqortumik iliortoqarpoq

Kultureqarnermut naalakkersuisup Ane-Lone Baggerip pineqatoq eqqortumik suliarineqarmat, aalajangernerlu KNR-ip tusaatissatut tigummagu iluarisimaarpaa.

KNR-ip nutaarsiassaqartitsiviani  tusagassiortut marluk amerikamiut nunanut allanut naalakkersuisoqarfianit tapiiffigineqarlutik siorna oktoberimi angalaneranni ilanngutassiarineqartut allaaserineqartullu tamarmik peerneqassasut, KNR tallimanngornermi ualikkut aalajangerpoq.

Taama pisoqarpoq, Namminersorlutik Oqartussani Ilinniartitaanermut, Kultureqarnermut  Ilageeqarnermullu naalakkersuisoqarfimmi inerniliisoqarmat. KNR-immi radiomi TV-milu inatsit, angalanermi timmisartunut akunnittarfinnilu unnuinermut tapiiffigitinnermigut unioqqutippaa.

§ 48-mi ima allaqqavoq:

  • Aallakaatitassianut aningaasalersuisarnerup iluaniipput radiukkut tv-kkulluunniit aallakaatitassianut, tassunga ilaallutik tekst-tv-mi imaluunniit internetikkut elektroniskiusumilluuniit periarfissat allat atorlugit takutitanut toqqaannartumik toqqaannanngitsumilluunniit tapiissutit suulluunniit, inuup ingerlatsiviulluunniit aallakaatitsinermik aallakaatitassiornermilluunniit ingerlataqartuunngitsup, atermi, ilisarnaatimi (logo), kinaassutsimi, ingerlatami nioqqutissiamiluunniit ilisimaneqarnerulernissaat siunertaralugu aningaasaliiffigisai.

§ 48-mi imm. 6-imi ima allaqqavoq:

  • Aallakaatitassiat nutaarsiassanik maannarpiarlu soqutiginartunik imallit aningaasalersorneqaqqusaanngillat.

Paasissutissat: Radiokkut tv-kkullu aallakaatitsisarneq pillugu Inatsisartut Inatsisaat nr. 7,8. juni 2014-imeersoq

Taama aalajangerneq kultureqarnermut naalakkersuisup Ane-Lone Baggerip iluarisimaarpaa.

- Pineqartoq eqqortumik suliarineqarpoq, aalajangernerlu KNR-ip tusaatissatut tigummagu iluarisimaarpara,  malittarisassallu siunissami malinneqarnissaat qulakkeerniarneqarmata iluarisimaarlugu, Ane-Lone Bagger mailikkut KNR-imut taama allappoq. 

Pisortaq: Arlaannaannulluunniit attuumassuteqanngilagut isornartorsiuillutalu

Pisortani sulisut, inuussutissarsiuteqartut sinniisui, kalaallillu USA-mi najugaqartut USA-mut angalanermi apersorneqarput, radiomut TV-mullu ilanngutassiortoqarluni, kiisalu allaaserisat KNR-ip nittartagaanut aamma ilanngunneqarlutik.

USA-mut angalanerup USA-mit tapiiffigineqarnera, KNR-ip allaaserisani nammineerluni erseqqissaatigaa.

Tapiiffigineqarneq nittartakkakkut oqallissaarisartumit Qarsoq Høegh-Dam-imit isornartorsiorneqarpoq videoliamilu Facebookimi saqqummiunneqarluni.

KNR USA-mut angalanerup kingorna isornartorsiorneqarpoq, USA-mit pisiarineqarsimasutut taaneqarluni. 

Taama isornartorsiuineq KNR-ip pisortaanit Karl-Henrik Simonsenimit ilumuunnginnerarneqarpoq,

Taassuma qulakkeerlugu oqaatiga, tusagassioriaaseq KNR-imi suliarineqartartut

arlaannaannulluunniit attuumassuteqanngimmata isornartorsiuisoqarmallu.

- Angalaneq  sioqqullugu, angalanermi aamma angalareernerup kingorna taamaappoq taamaattuaannassaarlu Karl-Henrik Simonsen tallimanngornermi taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat