Bagger: Tuluit Nunaannik niueqatigiinnermut isumaqatigiissuteqarnissamut isumalluarnartunik tusartarpugut
Konservativit siuttuat, Boris Johnson, EU-mit ilaasortaajunnaarnissamut qinersartunit naammattorsuarmik tunuliaqutserneqarpoq.
Johnsonimmi partiia tuluit inatsisartuisa aappaanni Underhusettimi amerlanerussuteqarlualerpoq, tamatumalu ilaatigut statsminister Mette Frederiksen ilimasutsilerpaa, Brexit taamaalilluni qaammatialuit ingerlaneranni piviusunngorsinnaasoq.
AAMMA ATUARUK Raajat saarulliillu nunatsinneersut Tuluit Nunaata akitsuusersornianngilai
Nunanut allanut tunngasunut naalakkersuisup, Ane Lone Baggerip, oqarnera naapertorlugu, Namminersorlutik Oqartussat Tuluit Nunaannik niueqatigiinnermut isumaqatigiissuteqarnissamut isumalluarnartunik tusartartut:
- Taamaammat Tuluit Nunaanni ministereqarfinneersunik pisortatigoortuunngitsumik ataatsimeeqateqartarlutalu oqaloqateqartarpugut, Tuluit Nunaannillu niueqatigiinnermut isumaqatigiissuteqarnissamut isumalluarnartunik tusartarpugut, Ane Lone Bagger KNR-imut mailikkut allappoq.
Savalimmiut januaarimi isumaqatigiissusiorput
Niueqatigiinnermut isumaqatigiissut Tuluit Nunaat EU-mi ilasortaajunaarpat atuutilissaaq, niueqatigiinnermillu EU aqqutigalugu maannamut isumaqatigiissutaasut atorunnaarpata ilaatigut kinguppannik uusunik qalipaajakkanillu amerlasoorsuarnik tunisaqaannarnissaq qulakkeerinnissalluni.
Savalimmiut Tuluit Nunaannik niueqatigiinnermut januaarimili isumaqatigiissusiorput, nunarpulli taamaaliorsinnaasimanngilaq.
Nunatta EU-llu isumaqatigiissutaat allat peqqutigalugit, Tuluit Nunaannik isumaqatigiissuteqarnissaq, Tuluit Nunaat EU-mi ilaasortaajunnaareerpat aatsaat pisinnaasoq, Ane Lone Bagger siusinnerusukkut oqarpoq.
Tamannalu periaannanngorpoq:
Bagger: Qaffasissumik atorfilittat ulappupput
- Nunatta Tuluit Nunaanni niueqateqarnermini maannamut sinaakkutai, Tuluit Nunaata EU-mut maannamut ilaasortaaneranik tunngaveqarput – tamannalu allanngussaaq, Ane Lone Bagger allappoq.
Tuluit nunaannik niueqateqarnermi maannamut najoqqutassat 2020-p naaneranut atuuttut, Namminersorlutillu Oqartussanik qaffasissumik atorfillit nutaamik isumaqatigiissusiornissanut piareersaataasumik tuluit ministereqarfiinut attaveqarluarnissamik suliaqarsimasut, taanna ilisimatitsivoq:
AAMMA ATUARUK Savalimmiormiut tuluillu niueqatigiinneq pillugu isumaqatigiissuteqartut
- Tamannalu immaqa iluaqutaasimavoq, tassami tuluit naalakkersuisuisa kalaallit tunisassiaat isumaqatigiissuteqaqqaarani ilaasortaajunnaaratarnissamik akitsuusersugassatut allattukkaminnut ilanngussimanngilaat. Tamatuma saniatigut aamma tuluit aalisartortaat aamma nunatta imartaani aalisagartassaqartut eqqaasitsissutigaarput, Ane Lone Bagger allappoq.
