Bagdadimi qaartartumeerisoqarmat inuit 132-t toqutaapput
Imminut toqoriaatigaluni qaartartumeerisoqarsimanissaa ilimagineqarpoq, qaartartut inatsiseqarnermut ministereqarfiup Bagdadillu guvernøriata allattoqarfiata silataani qaartinneqarput. Qarmasissiat, igalaamerngit biilillu ikuallannikut imaaginnavipput.
Irakimi ullumi saassussinerit ukioq manna sakkortunerpaanut ilaapput. Inuit 132-t toqutaasimasut, allallu 512-it qaartartumeerinerni ikiligaasimasut oqaatigineqarpoq.
Irakimi taamatut saassussisoqartarnera paasiniaavigineqartariaqartoq, Irakimi naalakkersuisut sinnerlugit oqaaseqartartoq Ali al-Dabag oqarpoq, Naalagaaffiillu Peqatigiit misissuinissaq pillugu Irakiliaqqullugit.
Irakip siuttorisimasaata Saddam Husseinip partiaanik Baathimik tapersersuisut Syriamiunit ikiorneqartarnerarlugit Irakimi maanna aqutsisut oqaatigisarnikuuaat.
Baathimik tapersersortit aggustimi qaartartumeerisimasuunerarneqarput, inuit 100-t taamanikkut toqutaammata.
Inatsiseqarnermut ministereqarfiup ungasinngigisaani aggustip 20-ani aamma qaartartumeerisoqarpoq, inuit 100-t taamani toqutaallutik. Nunanut allanut ministereqarfik aningaasaqarnermullu ministereqarfik taamanikkut qaartartumeerneqarput.