Baffinnip kangerliumarngani ujaarlertoqarusunngilaq

Baffinnip kangerliumarngani uuliamik gassimillu ujaarlernermut ingerlatsisussarsiornermut qinnuteqaateqarnissamut piffissaq killiliunneqartoq Nuummi tallimanngormat ullaakkut nalunaaqutaq qulingiluanut killeqarpoq. Aatsitassanulli naalakkersuisoqarfimmut ukioq manna qinnuteqaateqartoqanngilaq.

Uulia akikimmat qinnuteqaateqartoqannginnera tupaallannanngitsoq naalakkersuisoqarfiup paasissutissiissutigaa.

- Ukiormanna soqutiginnittoqannginnera uuliasiornermik ingerlatsisut akornanni tunuarsimaarnerannik, piffissamilu isertitakiffiusumi ujarlernernik ingerlatanut ingammik eqquinerusoq, naalakkersuisoqarfik allappoq.

Baffinip Kangerliumarngani uuliamik gasimillu ujarlernissamut neqeroortitsineq uuliamut gasimullu periusissiami 2018-imi atorunnaartussami kingullermut tulliuvoq. Soqutiginnittoqanngikkaluartorli Naalakkersuisut periusissiap atorunnaarnissaanut malinniarpaat.

- Taamaaliornikkut aningaasaliiffissatut pilerinassusaanut sunniuteqarnerlussinnaanera pinngitsoorneqarsinnaammat, Naalakkersuisoqarfik taama allappoq.

Uuliamik gassimillu misissuisoqarpallaannginnera NUNA OIL A/S-imut, Namminersorlutik Oqartussanit pigineqartumut oktobarimi kinguneqarpoq. Ingerlatseqatigiiffiup aningaasartuutai ikilisinniarlugit pisortaq atorfimminit tunuarpoq, siulersuisunullu ilaasortat tallimanit pingasunut ikilisinneqarlutik