Baffinip Kangerliumarngarni nannut piaqqinikinnerulissasut
Aaqqiissuteqarneq: Ilanngutassiap qulequtaa quleqaaraalu allanngortinneqarput.
Nannut misissorneqartut ukiup ingerlanerani sikumiinnatik nunamiittarnerat sivitsoriartortoq, misissuinerup nutaap atuagassiami Ecological Applicationsimi saqqummiunneqartup takutippaa. Tassa nunamiittarnerat ukiup ingerlanerani agguaqatigiissillugu ullunik 30-nik ilaneqarluni ulluni 90-ini nunamiittartut paasineqarpoq.
Nannut pineqartut nunamiinnerusalernerat pissutaalluni puisitornikinnerusalerput, salunnerulerlutik, kinguaassiorsinnaanerallu aamma innarlerneqartarluni.
Nannut sikumiinnginnerusalernerat pissutaalluni piaqqiornikinnerusalersartut, immikkut ilisimasalik misissueqataasoq Kristin Laidre CBC Newsimut oqarpoq.
Nannulli ataatsimut isigalugu ikiliartornersut maannamut takuneqarsinnaanngitsoq Laidrep oqaatigaa.
Nannut maannamut ajunngillat, Qeqertaalummilu piniartut tamanna tupigusuutiginngilaat, taakkumi oqaatigiuarsimavaat nannut amerlassutsimikkut aalaakkaasorujussuusut.
Nannut Baffinip Kangerliumanersuani Qeqertaalummiittut, Bylot Soundimiittut Kalaallit Nunaatalu avannamut kippasissortaaniittut 2800-t missaanniipput.
