Babydoc Haitimut uterpoq

Haitimi kisermaassilluni naalakkersuisuusimasoq, Babydoc, ukiuni 25-ni qimaaqqareerluni angerlaqqippoq. Tamanna mallersumi eqalussuup piniartarneranut amerlasuut assersuuppaat.
januaarip 17-at 2011 11:50

Uternissaali tapersersortaanit ilimasaarutigineqareersimasoq, DR-imeersup Ida Ebbensgaardip oqaatigaa.

Kisermaassilluni naalakkersuisuusimasoq utermat tapersersortai 200-t Port au Prince-mi nuannapput. Jean Claude Duvalier, Babydocitut ilisimaneqarnerusoq, jakkilerluni, qilerniusalerluni naalagaaffiullu sinniisaatut passeqarluni akornuteqanngitsumik timmisartoqarfimmi nunamut isertinneqarpoq.

Babydocilli uternera tamanit nuannaarutigineqanngilaq. Babydocimmi naalakkersuisuunerata nalaani pisut Haitip oqaluttuarisaanerani amiilaarnarnerpaajupput. Naalakkersuisuunermi nalaani naalliutsitsinerit, inuit tuusindillit, ilaatigut politikkikkut illuatungiliuttut toqorarneqarneri akisussaaffigai, nunallu piitsuulluinnartup aningaasaataanik tilligarujussuarluni.

Taamaammat 2007-mi præsidentiusup Prevalle-p Babydoc iliuuserisarsimasani pillugit eqqartuunneqartariaqartoq oqaatigigaluarpaa. Ippassarli Babydoc utermat maannakkut ministeriunerusup, Bellerivep tuini qaffaallatsilaaginnarpai oqarlunilu; Haitimiuugami, qaqugukkulluunniit utersinnaasoq.

Babydoc 1971-imi 19-iinnarnik ukioqarluni ataatani, Papadoc kingoraarlugu inuunini naallugu præsidentiusussatut ivertineqarpoq, tamatumalu kingorna ukiuni 15-ini peqqarneeqisumik naalagaaffimmik aqutsilluni - namminerlu immikkut peqqarniisertarnermikkut tusaamanerlugaaqisunik politeeqarluni. Babydoc 1986-imi Haitimiit qimaasariaqalerpoq, ukiullu kingulliit 25-t Frankrigemi najugaqarsimalluni. Maannakkuli tassa Haiti, siorna nunap sajunnerata kingorna suli paatsiveerusimaarfioqisoq uterfigaa. Præsidentimullu aappassaanik qinersinissaagaluaq kinguartinneqaqqammerluni qineqqusaarnerit ingerlanneqaleruttorput.

Haitimi maannakkut uivertoqarnera Babydocip pissaaneqalerniarluni atorluarniassagaa, DR-imeersup Niels Lindvigip Amerika Kujallermiit ilimaginerarpaa. Haitimi nuna sajorujussuareersoq nunap pinngorteqqittutut ilinissaanut Babydoc peqataarusulluni uternissani siornatigut oqaatigisareerpaa.