B67-ip isikkamik arsartartut pikkorissut F.C. Københavnimut sungiusariartortittalersinnaanissaat neriuutigaa.Assi: B67

B67-ip danskit mesterii F.C. Københavnimeersut suleqatigilerai

Danskit arsaattartuisa klubbiinit nunatsinni klubbimik aatsaat siullermeertumik suleqatigiittoqalerpoq.

Isikkamik arsartartut B67 Nuummeersut danskit pissartaat F.C. København suleqatiginissaannik isumaqatigiissuteqarfigaat.

Arsartartulli nunani avannarlerneersut klubbiisa akornanni suleqatigiinnerulernissamut tamanna aallartissutaaginnartoq, B67-ip siulittaasuata tullia, Kenneth Kleist oqarpoq.

- Nunat qaninnerpaasagut soorlu Island, Savalimmiut soorunami aamma Danmark klubbitigut suleqatiginerat aallartikkusupparput. Maannakkut ineriartortoqarnera qanittumilu annerusumik ineriartortoqarnissaa pissutigalugu taamaaliorpugut. Klubbitsinni siunissamut piareersarpugut, siulittaasup tullia oqarpoq.

Ineriartorneq pitsaasoq

Suleqatigiilerneq B67-ip alloriarnerani tulliavoq, B67-imi ukiuni tulleriinni allanngorarrtuunngitsumik toqqammaveqarluarlunilu U3-nit arsartartutoqanut immikkoortorpoq, kiisa niviarsiaqqanut arnanullu immikkoortortaqaleqqammerluni.

Ineriartornerlu pitsaasoq una F.C. Københavnimi aamma maluginiarneqarsimavoq.

- B67-ip Nuummeersup attavigimmatigut soorunami suleqatigiilernissamut ammavugut, aamma Kalaallit Nunaanni arsartarnerup ineriartorneranik soqutiginnillutalu sapinngisatsinnik taperseerusuppugut, FC Københavnimit Anders Hall Tof oqarpoq.

F.C. Københavnip suleqatigilernera B67-imut piffissami qaninnerusumi aammali ungasinnerusumut sunniuteqarluassasoq Kenneth Kleistip nassuiaatigaa.

- Meeqqanut immikkoortortami aamma inuusuttunut immikkoortortami immitsinnut attaveqarfigissaagut. B67 immikkoortormi tassani iluaqutissarsinerpaassagunarpoq.

- Piffissami ungasinnerusumi arsartartugut pikkorinnerpaat F.C. Københavnimi ilaalersissinnaanerlugit takujumaarparput. Soorunami unamminissarujussuuvoq. Sammiviit soqutinarluinnartuupput, taanna oqarpoq.

Akisussaaffik

Timersornikkut klubbit marluk akornanni suleqatigiinnerup saniatigut B67-ip akisussaaffimmik tigumminninnissaq aamma ukkataraa.

Taakkumi oqarasuaatikkut siunnersuisarfik Tusaannga imminut toqunnermik pinaveersaartitsinissamut Tusaanngallu ilisarnaataanik atisaminni assiliartaqarnissamut aamma isumaqatigiissuteqarfigaat.

- Isikkamik arsartut klubbiatut meeqqanut inuusuttunut soorunamilu inersimasut ilaannut akisussaaffeqarnissarput uatsinnut pingaaruteqarpoq. Tamanna akisussaaffittut angisuutut isigaarput.

- Piimmaginnittoqartarnera atugarissaartoqarneralu ukkartaringaatsiassavagut, kiisalu imminut toqunnermik pinaveersaartitsineq assinganik aamma ukkataringaatsiassallugu, nunamimi immikkut ajoraluartumik maluginiagassaqarfiusumiippugut. Klubbitsinnilu taamaaliorniarsarivugut, Kenneth Kleist naggasiivoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl