B52 pillugu Danmark EU-p isoraa

Avanersuarmi timmisartorsuup qaartartunik usisup 1968-imi nakkarneranut atatillugu Danmark EU-mit isornartorsiorneqarniarpoq.

Maanna ukiut 40-ngajaat qaanngiussimalerput Amerikamiut timmisartuat B52 qaartartunik atomitalinnik usilluni Pituffiup eqqaani nakkarmat. Maanna Europa-Parlamentimit isumaliutissiissut akuerineqartussanngorunarpoq. Isumaliutissiissummi tassani Danmark isornartorsiorneqarpoq sulisartunik timmisartup nakkarnerata kingorna saleeqataanermik kinguneranik napparsimalersimalersimasunik sumiginnaasimasutut. Aviisimi Informationimi taama allaaserinnittoqarpoq.

Pituffimmi sulisartunut tunngatillugu suliassaq Jens Peter Bonde-mit Junibevægelsimeersumit saqqummiunneqarpoq.

- Ukiuni 28-ni siullermeerlunga EU-mi danskit naalagaaffiat akerlilerlugu iliuuseqarpunga, taamaattorli suliassaq una Danmarkimut nuannerpallaanngilaq, Jens Peter Bonde aviisimut oqarpoq.

Bondep matumani eqqarsaatigaa danskit oqartussaasuisa ukiumoortumik sulisartut peqqissusaasa misissuiffigineqartarnissaanik itigartitsisimanerat, naak tamanna isumaqatigiissut Euratom naapertorlugu qinngornernit ulorianartunit qinngorfigitissimasutut tamanna pisinnaatitaaffigigaluaraat.

Jens Peter Bonde aammattaaq isumaqarpoq peqqinnissamik isumaginnittut sulisartut peqqissusaannut tunngasut isertuussimagaat.

Suliap tassunga tunngasortaa EU-mi ataatsimiititaliap akisussaasup akuersaarsimavaa tamannalu SF-ip Europaparlamentimi ilaasortaatitaata Margrethe Aukenip tupigusuutigaa, taannami isumaqarami tassunga tunngasumik suliassaqanngitsoq.

- Suliassaq iternga tikillugu suliarineqareerpoq, nappaataannullu qinngortissimanerat pisuunersoq uppernarsarneqanngilaq, Margrethe Auken oqarpoq.

Margrethe Auken oqarpoq, danskit naalagaaffiata Pituffimmi sulisartuusimasunut sumiginnaasimasutut unnerluutiginninnerit eqqunngitsuunerarsinnaagai, taamaattorli isumaqatigiissummit Euratomimit malersorneqannginnissaq pingaartinneqarnerusoq – taamaalillunilu nunatsinni suliassani atomimut tunngassuteqartuni EU-p akuutinneqannginnissaa pingaartinneqarnerusoq.

- Eqqarsaatiginngitsoorsinnaanngilara Kalaallit Nunaanni sumi arlaanni EU-p akuliunnissaa kissaatigineqanngitsoq, Margrethe Auken oqarpoq.