B-67 isikkamik arsaalluni nunatsinni pissartanngorniunnermi ajugaasoq
Nuummeersoq B-67 Qeqertarsuarmeersorlu G-44 nunatsinni finalimi unammimmata, B-67 4-0-imik ajugaavoq.
Isikkamik arsaallutik nunanut allanut unammisartut sungiusaasuata, Morten Rutkjærip, finalimi unammisut Kalaallit Arsaattartut Kattuffiata, KAK-ip, facebookkikkut quppernerani nersualaarpai.
- B-67 finalemi kusanartumik arsaappoq, ajugaanerallu inissaminiissimalluni. Holdimi misilittagaqarluartunik arsaattoqarluarpoq, arsaattartuilu finalini unamminernit misilittagaqarluarput. G-44-kkut unammersuarnerup ingerlanerani tamarmi arsaalluarput, finalemilu sapinngisartik tamaat takutitsillutik. Holdit marluullutik ukioq manna Nunatsinni Pissartanngorniunnermi angusaminnik tulluusimaarutissaqarluarput, Morten Rutkjær oqarpoq.
Jonas D. Morsing finalimi arsarluarnerpaatut toqqarneqarpoq.
Arfininngormat aamma bronzinnanniuttoqarpoq.
Tassani Maniitsumeersoq Aqissiaq Nuummersumut IT-79-imut unammivoq. Tassani Aqissiaq 5-0-imik ajugaavoq, bronzennallunilu.
Maniitsumi ukioq manna pissartanngorniunnermi iligiit sisamat peqataapput. KAK-llu siulittaasuata, Kenneth Kleistip, illoqarfik pissartanngorniuffiusoq peqataasullu nersualaarpai:
- Arsaattartut Isikkamik arsaallutik ukioq manna pissartanngorniunnermi unamminerminni assut naligiittaramik isiginnaarianut pissangatitsipput. Maniitsormiunut aaqqissuussamut kusanartumut, dommerinut kajumissutsiminullu ikiuuttorpassuarnut qujarusuppunga. Kakkaginaqaaq. Illoqarfik tamaat tapersersuimmat, aaqqissuussaq oqittunnguatut isikkoqartilerpaat. Illoqarfik taamannak tapersersuisoq immikkuullarissuuvoq, Kenneth Kleist oqarpoq.
