B-67-imi arsartartut marluk hashimik tigummiaqartut tigusarineqarput

Angutit isikkamik arsaallutik nunatsinni pissartanngorniunnerat kusanaatsuliorfioqqippoq. B-67-ip Nuummeersup arsartartui marluk hashimik tigummiaqartutut unnerluutigineqarlutik tigusarineqarsimapput. GM-ertoqarneranut atatillugu hasheerniartoqarneranik tusakkat ullaap tungaani qisuariarfigaat. Ini misissuiffigineqarpoq, hashimillu anginngitsumik aningaasanillu nassaartoqarluni.
Allattoq Nutaarsiassaqartitsivik / Nyhedsredaktionen, Simon Uldum
aggustip 21-at 2013 11:45

Hashi nassaarineqartut B-67-ip arsartartuinut marlunnut atassuserneqarsinnaasimavoq. Hashimik tigummiaqarnertik nassuerutigaat, eqqartuussissutigoortumillu kinguneqartinneqarnissaa naatsorsuutigissavaat.

Politimesterip tulliata Morten Nielsenip Nunatta Politiivineersup erseqqissarpaa, paasissutissat pissarsiarineqartut tamarmik arsartartut marluinnaat akuliussimanerannik tikkuussisut.

-Arsartartut allat akuusimanissaannik tikkuussisunik paasissutissaateqanngilagut. Inuit marluk hansheerniarnerisa unammisartoqatigiinnik tamanik pisariaqanngitsumik pasilliisoqarneranik kinguneqarnera ajuusaarnartupilusuuuvoq, oqarpoq.

Arsartartut pineqartut marluk killisiorneqareeramik iperagaapput. GM-imut peqataaqqusaajunnaarsitaapput. B-67-illu tusagassiorfinnut nalunaaruteqarlutik oqaatigaa arsartartut taakku marluk timersoqatigiiffimmit anisitaanissaat sulissutigalugu.

GBU-p siulittaasuata Lars Lundbladip oqaatigaa B-67-ip G-44-llu pissartanngorniutivinnissaannut kinguneqassanngitsoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq