B-67 atornerluisarnermut akersuunnialerpoq
Taamaammat Politiit ikiaroornartut pillugit suliaqartartui, Paarisa, Peqqissutsimut naalakkersuisoqarfik kiisalu Kalaallit Nunaani Timersortartut kattuffiat arsaattartut klubbiannit attaveqarfigineqarsimallutik.
Tamatumunngalu atatillugu B-67-imi sungiusaasut aggustip 28-iani 2013-imi ataatsimeeqatigeereerlutik GIF-imut saaffiginninniarlutik aaliangerput, timersortartullu peqatigiiffii tamarmik aningaasatigut tapiiffigineqarnissaat siunnersuutigaat, tassa ikiaroornartunut, soorlu hashimik atuisimanermik takutitsisinnaasunik uuttuutinik tapiissutit atugassianngortikkumallugit. Hashimimmi atuisimaneq uuttuutit atorlugit paasineqarsinnaavoq, uuttuutilli taakku akeqarmata pisiarineqartalernissaanut akissanik GIF-imit tapiiffigitinneqartalersinnaanissaq B-67-imiit neriuutigineqarluni. Aamma GIF-imit tapiiffigineqassanngikkaluarpata B-67-ermiut namminneerlutik taakku aningaasartuutiginissaat piareersimaffiginerarpaat. B-67-ermiulli killeqartumik akissaqaannarmata GIF-imit tapiiffigineqarsinaanissartik neriuutigaat.
Tassa siunissami pissartanngorniuuttoqanngilaattaani unammiartoqataanngittoqarnerani arsaattartut tamarmi ikiaroornartutorsimanersut pinngitsooraik uuttortaavigineqartalissallutik. Tassa ikiaroornartutortoqarsimasoq paasineqarpat paasisaasoq unammisartoqatigiinnniit peersinneqartalissaaq, Anti-Doping Grønlandilu tamatuminnga tusarlerneqartalissaaq paasisaasullu pillarlugit unammeqqusaajunnaartalernissaannik ilaatigut pineqaatisinneqartarnissaat siunniunneqarluni. Tamannali pitinnagu GBU-mut, GIF-imut kiisalu Anti-Doping Grønlandimut isumassarsiaq pillugu B-67-ermiut oqaloqatiinneqqaarniarput.