GM: B-67 aamma IT-79 pissartanngorniutivittussanngortut

B-67 Nuummeersoq, pissartanngorniunnernik aaqqissuisunut G-44-mut, Qeqertarsuarmeersumut, siulliullutik unammipput, B-67-ilu tassani 2-1-imik ajugaalluni.

B-67 2-0-imik siuaqqaarpoq, G-44-li ataatsimik isertitsivoq 2-1-inngorluni. Isertitsisoqaqqinngilarli, B-67-ilu finalimut anngulluni.

Nagdlùnguak’ 48, Ilulissaneersoq, IT-79-imut, Nuummeersumut, unamminerit aappaanni naapipput. Nagdlùnguak’ IT-79 straffertitsisoqarnera isertitseqqaarpoq, Nagdlùnguak’ kingorna taava pingasoriarluni isertitsivoq 3-1-imillu siuarluni. IT-79-imeersulli unamminerup naammassinnginnerani marloriarluni isertitsimmat unammisut 3-3-mik naligiipput, unamminerlu sivitsorneqartariaqarluni.

Unammineq naammassimmat IT-79 4-3-mik ajugaavoq, pissartanngorniutivittussallu tassaalerput B-67 aamma IT-79.

Aqagu arfininngornermi bronzinnanniuttoqarlunilu pissartanngorniutivittoqassaaq, unamminerillu KNR1-ikkut KNR Radiokkullu toqqaannartumik malinnaavigineqarsinnaassapput.

Bronzinnanniunnerup aallakaatinneqarnera nalunaaqutaq 12:50, aallartissaaq, pissartanngorniutivinnerlu nalunaaqutaq 14:50 aallakaatinneqassalluni.