Politikerit kigutileritinnissamut neqeroorutit suussanersut aalajangersinnaaniassammassuk peqqissutsimut naalakkersuisoq, Martha Abelsen, aggustimi misissuititsiniarpoq.Assi: Foto: KNR

Bøjlilertinnissamut misissuinerit sukateriffigineqartut

Meeqqat bøjlilertussatut innersuunneqartut ikilisimapput, bøjlilersuisarnerilli unitsinneqanngillat. Kigutilerisunik immikkut ilisimasalinnik amigaateqarneq taama allannguinermut pissutaasoq, peqqissutsimut naalakkersuisoq nassuiaavoq. Pisariaqartitsivittulli suli bøjlilerneqartarumaartut taanna oqarpoq.

- Meeqqat pisariaqartitsivissut innersuunneqarsimasullu, kigutiminni bøjlilertariaqartut suliaritittariaqartullu, maannamut ingerlasut ingerlareersullu aamma nutaat takkuttussat suli suliaritinneqartarnissartik suli naatsorsuutigisinnaavaat, Martha Abelsen oqarpoq.

Immikkulli ilisimasalinnik amigaateqarneq pissutigalugu bøjlilersortinnissamut innersuunneqartut ikilisimapput.

- Pinnersaatitut bøjlertikkusuttunit siullermik malugineqqaqqaassagunarpoq, naalakkersuisoq oqarpoq

Pinaveersaartitsinerusoqartalersimasoq Martha Abeslen aamma oqarpoq.

AAMMA ATUARUK Meeqqat kigutaannik narlorsaasarneq unitsinneqanngilaq

Innuttaasut tamarmik pisortanit kigutigissarneqarsinnaanngippata meeqqat inuusuttullu salliunneqassasut, meeqqallu tamarmik akeqanngitsumik aalajangersimasumillu akuttussusilimmik kigutileritissinnaatitaasut Namminersornerullutik Oqartussat kigutigissaaneq pillugu nalunaarutaanni allaqqavoq.

Meeqqat bøjlilersortarnissaat sulisussaaleqineq pissutigalugu illersorneqarsinnaajunnaarsimasoq Peqqinnissaqarfiup Qullersaqarfia nalunaarsimasutut sapaatit akunnerata siuliani issuarneqarpoq.

Kigutinilli narlorissaasoqartarunnaanngitsoq peqqissutsimut naalakkersuisoqarfimmit Sermitsiaq.AG-mut oqaatigineqartumut ataasinngormat erseqqissaapput.

AAMMA ATUARUK Meeqqat kigutaasa narlorsartinneqarneri nammineq akilerneqartalissasut

Politikkikkut aatsaat aalajangertoqarsimatillugu kigutileritinnissamut neqeroorutinik allannguisoqarsinnaasoq naalakkersuisup tusagassiuutinut nalunaarummi erseqqissaatigaa.

Immikkulli ilisimasalinnik sulilersitsiniarnermi ajornartorsiortoqarmat Naalakkersuisut kigutigissaanermi suut neqeroorutaasinnaanersut misissortariaqaraat, Martha Abelsen oqarpoq.

- Allannguisoqassappat allannguut qanoq ittuussanersoq aggustimi paasissutissat pereerutsigit paasinarsissaaq. peqqissutsimut naalakkersuisoq Martha Abelsen oqarpoq.

Peqqinnissaqarfiup qullersaqarfianit Martha Abelsenimik apersuereernerput innersuussutigalugu apersorneqarumanngillat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat