AWG: Sølvit marlunnik ilapput
Sølvip aappaa Arctic Sports-imi unammeqataasup 17-nik ukiullip Jokum Langep pissarsiaraa unammeriaatsimi Alaskan Highkick-imi. Pingasunngornermilu unamminerni sølvip aappaa sangusaartartup Nuunu Chemnitzip pissarsiaraa marlukkaarlu sangusaarnermi.
- Angusarput assorujussuaq naammagisimaarpara. Nunat allat aqqaneq marluk missaannik unammisoqarlutik maaniipput. Uagut sisamaannaagaluarluta kulti ataaseq, sølvi bronzelu pissarsiaraagut, sangusaartartut sungiusaasuat Jens Berthelsen oqarpoq.
Nukapissat arsaattartut ingerlalluarput. Inuusuttut akulliit Yukonimut 3-3-mik naligiiginnarput kalaallini isertitsisuullutik Ari Hermann, Inuk Knudsen aamma Niklas Thorleifsen. Semifinale maanna qulakkeereerpaat ullumilu Nunavut unammisussaallugu. Kalaallit ajugaanissaat ilimanarpoq Nunavut ajorsarujussuaqattaarmat.
Inuusuttut nukarliit aamma ingerlalluarput ippassarlu Nunavut 8-2-mik ajugaaffigalugu. Isertitsisut tassaapput Kaaleeraq Mathiassen 5, Kuluk Hermann 1, Marco Leibhardt 1 aamma Karsten Andersen 1. Ullumi Alberta unammissavaat Nunarput assigalugu semifinalemut annguttussanngorunartoq. Kalaallit tullersortaagallarput maannamullu normu 3-gallartut Alaska 10-4-mik ajorsartereerlugit.
Arctic Winter Games sioqqullugu nivissat ujaminnanniunnissartik qulakkeeqqasimavaat niviarsissani nunat unammeqataasut sisamaannaammata. Ullumi Yukon unammissavaat.