AWG-p nittartagaa Nuummiit suliaraat
Timersortartut 2.000-it missaat issittumi nunat immikkoortuinit arfinilinneersut Yukon-mi illoqarfiit pingaarnersaanni Whitehorse-imi unammersuassapput ammaanersiornerlu sapaatiuppat tulliani pissaaq. Taakku saniatigut nammineq piumassutsimik ikiuuttut 2.000-it missaat suleqataassapput aaqqissuisullu Nunatsinniit aamma sullinneqartussanngorput.
Kimik IT 2002-miit issittormiut unammiuaartarneranni IT atorlugu sullissinnermi sulissussisartoq ukiormanna tamatuminnga iminneqaqqippoq.
Suliassaq ukiut ingerlaneranni minnerulersimanngilaq sillimaniarnermut najoqqutassiat aalajangersimaqqissaartut malinneqartussaallutik, suliassarlu timersortut angusaannut taamaallaat tunngasuussanngilaq.
- Ukiup ataatsip matuma siorna Whitehorse-imiippugut suliassap imarisai oqaluuseriartorlugit, Kimik IT-mi pisortaq Ian Wennerfeldt KNR-imut oqarpoq.
Nammineq piumassutsimik ikiuunniartut tamarmik nalunaarsorneqareerput aammalu sumut iseqqusaassanersut tamarmik aalajangersorneqareerlutik. Aaqqissuisut KNR-imut ilisimatitsipput sillimaniarnermi suleqataasut tamarmik pinerlussimannginnermut uppernarsaammik tunniussisussaatitaasimasut.
- Aamma nakorsat najoqqutassaannik sanasimavugut, timersortartut nakorsaatinik atuisuunermut qangalu kingullermik noqarnermut stivkrampe-mut kapitissimanersut nalunaarsorneqarluni. Tamanna suliarisimavarput peqataasut Whitehorse-mi nakorsanit suliarineqartariaqalissappata paasissutissat pingaaruteqartut erngerlugit aaneqarsinnaaniassammata, Ian Wennerfeldt nassuiaavoq.
Amerlaqisulli pingaarnertut malittarissannguatsiarpaat unammersuartut qanoq angusaqarnersut.
- Angusat tamarmik erngerlugit allattorneqartassapput nittartakkamullu ingerlaannaq ikineqartassapput paasissutissat eqqortuunersut dommerit uppernarsareeraangassuk, Ian Wennerfeldt oqarpoq.
Kimik IT sulisuminik marlunnik maanna Whitehorse-iliartitsiniarpoq sulisullu allat Nuummit Københavnimiillu piareersimassapput pisariaqalissappat ikiuunnissamut.
Arctic Winter Games malinnaavigineqarsinnaavoq pisortatigoortumik nittartagaq: http://www.awg2012.org/en/Home.aspx atorlugu
KNR amma ullut tamaasa nutaarsiassanik, assinik videonillu saqqummiusissaaq tamakkulu KNR-ip nittartagaani www.knr.gl-mi, radioaviisimi Qanoruumilu malinnaavigineqarsinnaapput.