AWG-mi medaljannannissaq ilimagineqalereerpoq
-Qularnanngitsumik medaljennannissaanik ilimagineqarput nerrivimmi arsaarartartut, sulorartartut, naggueqatigiit inuit timersuutaannik unammisartut, arsaattartut niviarsissat nukappissallu, aammattaaq indianerit timersuutaannik unammisartut angutit inersimasut isumalluarfigineqarput, Kangerlussuarmiit Grand Prairiemut aallalersoq Noah Mølgaard oqarpoq.
Noah Mølgaardip Badmintonertartut Kalaallit Nunaanneersut kuultinnannissaat ilimagilluinnarpaa.
- Batmintonimi qularnanngitsumik kuultinnannissaq ilimanarluarpoq, aamma nerrivimmi arsaararnermi indianerillu timersutaanni Dene Gamesimi orpissuarmik ajattaannermi Pole Pushimik taaneqartartumi kalaallit kuultinnakkumaartut angutit nukittoorsuit unammisussaammata, Noah Mølgaard naggasiivoq.
Unammiuaartitsinersuaq Arctic Winter Games ukioq allorlugu ingerlanneqartartoq, timersuutinik assigiinngitsunik taavalu naggueqatigiit inuit aamma indianerit timersuutaannik unammilluni ajugaaniuffiusarpoq. Timersuutit suuneri, unammisut angusaat nittartakkami www.gif.gl aqagumiit malinnaavigineqarsinnaassapput.
Arctic Winter Games marsip 13-iata tungaanut ingerlanneqassapput unamminerillu inerneri, toqqaannartumillu attaveqarnerit, unammeqattaarnerit ingerlanneranni KNR-Radiomi tusaasarsinnaajumaarpatit.
