AWG2016 AWG-ip ulluisa kingullersaat aallartiinnaqaat

Issittormiut unammiuaarnerat Artic Winter Games 2016 ullumi naggaserneqassaaq, timersuutini arlaqartuni ajugaaniutivittoqassaaq tamannalu timersortarfimmi Inussivimmi unnugu naggataarnersiorneqassaaq kingornalu qummmoroortarnersuaqassalluni. Ishockeyrtartut 200-t missaat Nuummut unnuaq tikipput, naggataarnersiornissamut peqataassallutik.
Assi © : AWG2016/Lars Weiss
marsip 11-at 2016 07:22
Nutserisoq Jaaku Lyberth

Ajugaaniutivinnerni pissanngatigineqartut ilagaat futsalerluni ajugaaniutivinnerit, Kalaallit Nunaata unammisartui angutini inuusuttuni aamma arnani nivissanilu anngusimasut, arnat Team North West Territoriamut unammissallutik. Angutit inuusuttut Team Alaska ajugaaniutivinnermi unamissavaat.

Futsalerluni Nuummi Illorsuaq Timersortarfimmi nalunaaqutaq aqqanermut ullup qeqqanullu ajugaaniutivittoqassaaq.
Futsalerluni bronzinnanniunnerit ullaakkut arfineq pingasunut aallartissapput, tamannalu KNR TV-p kanaliani 1-imi isiginnaarneqarsinnaapput.

Sisorarfinni aaqqissuisut silap ajunnginnissaanik kissaateqarput snowbordertartut unammisussaammata. Ujakkaartartut Nuussuup Mannguani unamminerit naggaserlugit unammissapput, apusiuserlunilu arpannerit unammissutigineqartussaallutik.

Sangusaartartut unamminerat ippassaq naammassineqarput, Qooqu Chemnitz Berthelsen inuusunnerit unammineranni kuultinnalluni.

Snowboarderluni unamminerit pilersaarutit naapertorlugit aqqanermut aallartissapput, unamminissaq taanna sisamanngornermi  pisussaagaluarpoq.

Issittormiut unammiuaarneranni Arctic Winter Games 2016-imi ujaminnattarineqartut ulut katikkaanni, Kalaallit Nunaat Alberta Northilu ujaminnannerpaat pingajuattut inissisimagallarput, Kalaallit Nunaata Alberta Northilu katillugit ujammit ulut 68-it pissarsiarimmatigit. Kalaallit Nunaat taakkunannga kuultit 33-t pissarsiarai.

Ujaminninnannerpaat tassaapput Alaskamit unammiartortut taakkua ujammit katillugit 170-it maannamut pissarsiaraat taakkunannga kuultit 65-it pissarsiaralugit.

Yukon ujaminnannerpaat tullersortigaat, taakkua 88-inik ujaminnakkamik taakkunannga kuultit 23-t.