AWG 2010-mi ingerlanneqartussaq Nuummi ingerlanneqassanngilaq

Ukiumi 2010-mi nunarput Arctic Winter Games-ini aaqqissuisuussanngitsoq naalakkersuisunut ilaasortap Doris Jakobsenip, Nuup borgmesteriata Agnethe Davidsenip Arctic Winter Games-inilu aaqqissuisut aallartitaata isumaqatigiissutigaat.

Isumasioqatigeererlutik isumaqatigiipput Nuuk illoqarfittut aaqqissuussiviussappat suliarujussuanngussasoq akisuallaassasorlu.

Piumasarineqarpormi sukuutsertarfimmik nutaamik basketballertarfimmillu sanatitsisoqassasoq.

Ajornartorsiutaavortaaq Nuup mittarfiata naappallaarnera. Arctic Winter Gamesimimi peqataasussat 1.600-t Kangerlussuarmiit Nuummukaassornissaat ajornartorsiutaasussaassaaq.

Naalakkersuisunut ilaasortap ilimagaa, nunarput Arctic Winter Games-imik 2012-imi, 2014-imi 2016-imiluunniit aaqqissuisuusinnaassasoq. Taamanikkussamut Nuummi mittarfeqarnerup aaqqinneqarsimanissaa, timersortarfiillu pisariaqartinneqartut sananeqareersimanissaat naalakkersuisup aamma ilimagaa.