Avissimasut ilinniaqarsimanngitsullu meeraat pualavallaarput pujortartarlutillu

Pualavallaarnermik ajornartorsiuteqarneq, pujortartartup puai qernertuinnaat aamma kræfti iliuuseqarfigissagutsigik, paasisitsiniaaffigineqartariaqartut tassaapput avissimasut meeraat aamma qaffasinnerusumik ilinniagaqarsimanngitsut meeraat.

Tassami taakkuupput pujortaliaarnerusartut aamma fjernsyninngikkaangamik tv-kkut pinnguaatinik pinnguarlutik issiavallaartartut, tamanna misissuinerup nutaap ersersippaa.

- Inuusuttuaqqanik peqqiitsunik pualasuunik qarasaasiap saavani pujortaatigalutik issiasunik qitornaqalernianngikkuit ilinniagaqartariaqarputit avinnaveersaarlutillu.

- Pujortartarneq issiavallaartarnerlu ajornartorsiutaasut takusinnaavarput. Eqqugaanerpaallu tassaapput meeqqat atugarissaarpallaanngitsut, Gert Nielsen, Kræftens Bekæmpelse-meersoq oqarpoq.

Tassami inuit peqqissuunerat inooqatigiinnermut attuumassuteqarpoq.

Naatsumik oqaatigalugu meeqqat sivikitsuinnarmik ilinniagalinnik imaluunniit ilinniagaqanngivissunik angajoqqaallit aamma avissimasunik angajoqqaallit pujortaliaarnerullutillu issiavallaartarput timersornerlu ajorlutik.

Taama inerniliisoqarpoq, 16-iniit 20-nut ukiullit inooriaasiannik misissuineq angisooq pillugu Danmarkimi Sundhedsstyrelsip aamma Kræftens Bekæmpelsip ullumi saqqummiussaani.

- Misissuinermi takusinnaavarput, angajoqqaat ilinniagaqarsimanngikkaangata aamma avissimagaangata ingammik niviarsiaqqat issiavallaartartut.

Misissuinermi paasineqarpoq niviarsiaqqat 16-iniit 20-nut ukiullit 9,8 procentii sunngiffimminni issiaannangajattuusut. Taakkua amerlanersaat avissimasunik angajoqqaaqarput imaluunniit atugarissaarfiunngitsunik angerlarsimaffeqarput. Tamanna Kræftens Bekæmpelsimit nassuiarneqarpoq ilaqutariit atugarissaarfiunerusut peqqinnarnerusumik inooriaaseqarnissamut timersornerunissamullu akissaqarnerusartut.

Taamaattumik Kræftens Bekæmpelsimit paasisitsiniaanermi inuusuttut pisariaqartitsinerusut saaffigineqarniartut Gert Nielsenip oqaatigaa.

Misissuineq Danmarkimi ingerlanneqarsimavoq kisianni nunatsinni aamma taamaattoqannginnerluni?