Avinneq meeqqat isaannit isigalugu

Suliniut nutaaq, angajoqqaat qimanneranni meeqqat misilittagaannik qitiutitsisoq, meeqqat pisinnaatitaaffii pillugit sullissiviup, MIO-p, aallartippaa.

Aviaja Rohmann Pedersen, suleqatigiinnik taasaminik "Meeqqat aliasuutillit", siusinnerusukkut aallartitsisimasoq, palasitullu atorfimminit maanna sulinngiffeqartoq, suliniummi aqutsisuuvoq.

Avissaarnerup pitsaanerpaamik meeqqanut atugassaqartitsinissaata eqqanaarsarneqarsinnaanera pillugu innersuussuteqarnissaq, suliniummi anguniarneqarpoq.

Meeqqat illersuisuata, Aaja Chemnitz Larsenip, meeqqat pisinnaatitaaffii pillugit sullissivimmeersup, neriuutigaa, qimannerup meeqqanit qanoq misigineqarsinnaanera suliniutip takutissagaa, oqimaassinnaasut kisiisa pinnagit, aammali meeqqanut angajoqqaanullu taama inissisimasunut innersuussutinik pitsaasunik tunniussissalluni.

Taamaammat meeqqat pisinnaatitaaffii pillugit sullissivik, MIO, immikkut ilisimasalinnik, nammineq ilaqutariinni avissaarnermik misigisaqarsimasunik inuttaqartumik suleqatigiiliornialerpoq. Meeqqat klassini minnerni atuartut tamarmik unammisitsinermut, qaammammi matumani aallartittussamut, peqataanissaminnut periarfissinneqassapput.

Avissaarneq misigisimasartik pillugu titartakkaminnik, oqaluttualiaminnik imaluunniit taalliaminnik meeqqat tassani nassiussisinnaassapput. Meeqqat, inuusuttut aamma inersimasut angajoqqaat qimannerat qanoq misigisimanerlugu oqaluttualianik meeqqat pisinnaatitaaffii pillugit sullissivik, MIO, aamma ujartuivoq.

Oqaluttuat MIO-p pissarsiarisai, meeqqanik inersimasunillu taama inissisimalersunut ikiuutitut atorneqassapput.