Aviisit sumiiffimmi naqitat piumaneqarluarput
Avannaani Qeqqani Kujataanilu aamma printerisinnaasunik peqalernissaq POST Erhvervip takorluulereerpaat. Inuussutissarsiutilinnut sullissinermut pisortaasoq pilersaarummillu ingerlatsisuusoq Salik Hard, ullumi misiliilluni naqiterileruttortoq pulaarparput, naqitererpalaarsuaq tusarsaavoq.
- Aviisit nunanit allaneersut toqqaannartumik attavigisarpavut. Aggustip qulingani aallartikkatta soorunami pissangassutigisimavarput. Nuummili pisisartut assut aviisinik nutaanik piumapput, Salik Hard oqarpoq.
-Soqutiginnittorujussuupput, takorluukkatsinnit sukkanerujussuarmik ingerlavoq. Maannakkut tunisaqarluartaqaagut, nassuiaavoq.
Aviisit nunanit allaninngaanneersuupput. Amerlanerpaat tassaallutik Danmarkimi aviisit saqqummersartut nalinginnaasut: BT, Ekstrabladet, JyllandsPOSTEN, Politiken allallut. Aammali aviisit ataasiakkaat Norgemi, Amerikami Savalimmiuniluunniit saqqummersartut printerneqartarput.
- Nunami allamioq Nuummi najugalik qaqugukkullunniit aviisi piumasani pillugu saaffiginnissinnaavoq. Italiamiut, Australiamiut Sydafrikamiulluunniit aviisi piumasaat pissarsiarisinnaassavarput, Salik Hard nangippoq.
Taamaammat aamma sinerissami printerinik minnerulaanik peqalernissaq eqqarsaatigaat.
- Maani Nuummi iluatsitserujussuarnikuugatta eqqarsalersimavugut, soormi sinerissami aamma pilersitsigutta. Aammami periarfissat pillugit paasiniaasut saaffigisaramisigut, oqarpoq.
Qaammatini marlunni misilittakkat suli annikissorigamikkit, sinerissami printereqalernissaq ukiup ataatsip marlulluunniit iluani ilimanarnerussasoq oqaatigaa.
Aviisit ataatsit aniatinneri sekundinik 21-inik sivisussuseqartarpoq.
Illoqarfiit sorliit aviisinik aniatitsissutinik printereqalissanersut Salik Hardip maannangaaq oqaatigisinnaanngilaa.