Aviisit annonciliisarneq pillugu oqqapput

Atuagagdliutini akisussaalluni aaqqissuisup, Inga Dora G. Markussenip tunuarnera nalunaarutigineqarmalli, pisortat aviisitigut sulisussarsiortarnerat pillugu oqallittoqaqqilerpoq.
Allattoq Elisa Isaksen
februaarip 16-at 2011 17:42

Atuagagdliutini pingaarnertut ullumikkut allaaserisami oqaatigineqarpoq, pisortat nutaanik sulisussarsiortarnerat qallunaat tusagassiorfiini aviisiinilu taamaallaat pisarnissaat, Naalakkersuisut piaaralutik isumagisaraat. Taamaalillutik kalaallit aviisii avaqqutaartarpaat.

Allakkiami Namminersorlutik Oqartussat iluminni pigisaani, Atuagagdliutit pissarsiarisimasaani, pisortat sulisussarsiorlutik annonciliigaangata tusagassiorfiit sorliit atorneqartarnissaannik Namminersorlutik Oqartussat najoqqutassaat takuneqarsinnaavoq.

Namminersorlutik Oqartussat "Sulisussarsiortarnerminni allattuiffianni" tusagassiorfik Nunatsinneersoq ataasiinnaq allassimavoq, tassaasoq aviiseeraq ussassaarutinik imaqartartoq Tiu Tiu, Nuummiinnaq sapaatip akunneranut ataasiarluni saqqummersartoq.

Atuagagdliutit Tiu Tiu-mik taamatut saqqummiussinerat pissutigalugu, Jens-Jakob Lennert-Sandgreen Tiu Tiu-meersoq takkajaarsuarmik tusagassiuutinut nalunaaruteqarpoq.

- Sermitsiap Atuagagdliutillu inuiaqatigiinni sunniuteqarnertik atorlugu imminnut iluaquserniarlutik Tiu Tiu-mik nikanarsaaniarnerat qatsupparput, ilaatigut taama allappoq.

Jens-Jakob Lennert-Sandgreenip aviisit pineqartut ullutsinni pissutsinut naleqqussarsimannginnerarlugit isornartorsiorpai, annonciliisussarsiornerminnilu pissusilunnerarlugit.

- Ataasiarnata misigisarparput, Nuuk Ugeaviisip, Sermitsiamit pigineqartup, annonciliisartuvut uagut akigititatsinniit akikinneroqisumik annoncileeqqullugit neqeroorfigisarai. Sermitsiap taamatut neqerooruteqarnermini piumasarisarpaa, ussassaarinerminni Tiu Tiu-mik atuissanngitsut.

- Tamanna unammilleqatigiinnermut akornutaasorujussuuvoq, inatsisillu misissoqqissaaraanni tamanna qularnanngitsumik inatsisinik unioqqutitsinerusoq paasinarsissaaq, Jens-Jakob Lennert-Sandgreen allappoq.