Aviisip Sermitsiap muuamaamik titartakkat saqqummiuppai!
Proffiitimik Muuamaamik quujassuaatiginnilluni titartakkat Sermitsiami aqagu saqqummersussami aamma ilanngunneqarsimapput.
Danskit kalaallillu tusagassiortut kattuffianeersoq Hans Jørgen Dybro oqarpoq, tamanna Sermitsiamut akisusinnaasoq, tassamigooq titartakkat aviisitigut saqqummersinnerat titartaasut piginneqqaartussaatitaanerannut 24.000 koruunit missaata nalinginik aviisi Sermitsiaq akiliisussanngussammat.
Akiliutilli taakku toqqaannartumik titartaasumut tuttussaanngitsut erseqqissaatigineqarpoq, piginneqqaartuusut aningaasaateqarfiannut ingerlaqqittussaasarmata.
Aviisip sermitsiap Muuamaamik titartakkanik ilanngussinerminut tunngavilersuutigaa, Kalaallit Nunaanni sermitsiamik atuartartut titartakkat taakku takusariaqaraat.
- Titartakkat sermitsiami ilaatinneranni angissusivianut naleqqiullutik minnerupput. Tamannalumi aalassatitsinaveersaarnermik aamma peqquteqarpoq. Ullumi radio aviisimi eqqaaneqarmat Sermitsiami ilaatinniarivut assut sianerfigiteqattaarpugut, ilannguteqqunagit kimigiisertunit, taakku annilaanngatigaat nunatsinnut kinguneqapilussinnaanera, Sermitsiap aaqqissuisua radio aviisimut oqarpoq.
Taanna erseqqissaavoq, innuttaasut suna pineqarnersoq paasisariaqarmassuk titartakkat ilaat saqqummersittariaqarlugit misigisimasimalluni.
