Aviisini titartaasartut pakatsinarput

Kulturip illorsuani Katuami qallunaat aviisini titartaasartut titartagaat maanna saqqummersinneqarput. Arlallit nunatsinnut tikeraarlutik titartaajartorsimapput. Pakatsinarpulli naak ilaat alutornaraluartut.
oktobarip 22-at 2012 10:35

Titartaasartut arlallit Inatsisartunut pulaarlutik politikkerit nuimasut quianartunngorlugit titartarniarsimavaat tamakkuli iluatsippallaarsimanngillat. Kalaallimmi politikkerii nuimanerit titartakkani ilisariuminaapput. Pakatsinartulli akornanni Anette Carlsenip Per Berthelsenimik titartagaa alutorinngitsuugassaanngilaq.

Titartaasartut arlallit nunatsinnut ilisimasakinnerat malunnarpoq aammalu qallunaat siumut isummiuteriigaannik imaqartarlutik. Titartaasut torrallaariaraluarnerminni quisaariaraluarnerat pikkunaappoq. Tamakkuli akornanni aamma alutornartoqarpoq Jyllandimiu titartaasartoq Jens Julius Hansen, Juliusimik taagortoq alutornartuliorsimammat. Taassuma titartarniakkami isumaa paasilluaqqaarsimavaa titartagaalu oqaatsinit 1000-it oqaluttuarluarnerupput.

Nammineerlutit qimerloorlugit qallunaat nunarput inuilu pillugit titartagaat aamma misissuataarsinnaavatit. Katuami saqqummersitsineq ullaap tungaa aqqanerniit takuniarneqarsinnaasarpoq saqqummersitsinerlu oktoberip 28-ata tungaanut takuniarneqarsinnaavoq.