Aviisimi allaatigisaq: Danmarkimi kalaallit najugaqartut ilageeqalerlik
Atuakkiortoq affarmik danskiullunilu affarmik norskiusoq Kim Leine, aamma psykoterapeut Henriette Berthelsen, Danmarkimi ilagiinnik kalaallinik pilersitsiniaqatigiinneersoq aviisimi Politikenimi ullumi taama allaatigisaqarput.
Danmarkimi tyskit ikinnerussuteqartut 15.000-it missaanniittut ilagiit danskit naalagaaffiata tapersersugaata ataani tyskinik sisamanik palaseqartinneqarnerat allaatigisaminni ilaatigut tikkuarpaat.
Taakkulu kalaallit Danmarkimiittut 16.000-it 25.000-illu akornanniittut ullumikkut marlunnik palasissaqartinneqarnerinut assersuuppaat - palasip aappaa Namminersorlutik Oqartussanit atorfinitsitaavoq kalaallinillu parnaarussanik aammalu Danmarkimut katsorsartikkiartortunik sullissisuulluni. Palasillu aappaata nunatsinneersut Danmarkimi najugaqalersimasut sinneri sullitassarivai.
Allaanerusumik pineqartut
Tamannalu naapertuutinngitsoq, oqaatigaat. Kalaallit Danmarkimi najugallit danskit ilagiivinut akileraartarput taamaattumillu aamma palasimit kalaallisut oqaasilimmit sulinneqartariaqaraluarlutik, allaatiginnittut taama isumaqarput.
Kim Leinep Henriette Berthelsenillu kalaallit Danmarkimi najugallit isummanit pigiliutiinnakkanit eqqugaasarnerat aamma tikkuarpaat. Aamma kalaallit Danmarkimi najugallit pisortanit sumiginnarneqarsoraat, kalaallit Danmarkimut nuunnerminni nunasisut nunanit killerneersuunngitsut assingalugit inuiaqatigiinnut akuulersitsiniarnermut neqeroorutinik tunineqarneq-ajormata.
